პირველი ნოემბრიდან საქართველოს კონკურენციის ეროვნული სააგენტო მომხმარებელთა უფლებების დაცვის შესახებ კანონის აღსრულებას დაიწყებს. კანონში ცვლილებები ივნისიდან შევიდა. ბოლო რამდენიმე თვე მისი აღსრულება სანქციების გარეშე ხდებოდა. 1 ნოემბრიდან მომხმარებელს შესაძლებლობა ექნება, 14 დღის განმავლობაში, ონლაინ შეძენილი ნივთი უპირობოდ უკან დააბრუნოს. წინააღმდეგ შემთხვევაში სანქციებისა და გაფრთხილების მექანიზმებია დადგენილი.
როგორც რადიო „კომერსანტის“ ეთერში ონლაინ-კომერციის ასოციაციის პრეზიდენტმა ლევან მოლაშვილმა განაცხადა, ეს სიახლე მომხმარებელსა და ონლაინ-სისტემას შორის ნდობას გაზრდის. მისი თქმით, კანონში არის ერთი ჩანაწერი, ნივთის 14 დღის შემდეგ უპირობოდ დაბრუნების შესახებ და მეორე, რომელიც მომხმარებელს საშუალებას აძლევს შემდგომი პერიოდის განმავლობაში, საუბარია რამდენიმე თვეზე, მოითხოვოს გარანტია და დაწუნების შემთხვევაში პროდუქტი უკან დააბრუნოს. მას მხოლოდ შიდა გადაზიდვის ხარჯების დაფარვა მოუწევს.
„ეს ჩანაწერები პრობლემური იქნება იმ კომპანიებისთვის, რომლებიც აწარმოებენ და ყიდიან თეთრეულს, სამკაულს, კარნავალის კოსტიუმებს და ა.შ. იმიტომ, რომ შეიძლება ეს კოსტიუმი ადამიანს მარტო ერთი დღით დასჭირდეს და მერე მისი უკან დაბრუნება მოინდომოს. რაც დრო გავა, კანონის ეს ნაწილი აუცილებლად დაიხვეწება და ასეთი შემთხვევები ინდივიდუალურად განიხილება,“ განაცხადა ლევან მოლაშვილმა.
„პირადად მე ვფიქრობ, რომ ამ ეტაპზე, ქართული ბაზარი ამ კანონპროექტისთვის მზად არ იყო. კანონი აუცილებლად უნდა მიგვეღო, მაგრამ ჯობდა, რომ მოგვიანებით - 5, 10 წლის შემდეგ. თუ ქართული ელექტრონული კომერციის ბაზარს უცხოურს შევადარებთ, მაგალითად ამერიკაში სამომხმარებლო კალათის 9%-ზე მეტი ონლაინ შესყიდვებზე მოდის, საქართველოში ეს ციფრი 1%-ის ფარგლებშია. ვიძახით რომ, გრძელვადიან პერსპექტივაში, ონლაინ-კომერცია ტრადიციულ კომერციას ჩაანაცვლებს, მაგრამ ეს როდის იქნება, არ ვიცით.
ახალი კანონი ძალიან ბევრი კომპანიისთვის იქნება მტკივნეული. ამ სიახლემ მთელ ონლაინ-ბაზარზე შესაძლოა ფასები 10-20%-ით გაზარდოს. ეს იმიტომ, რომ არაკეთილსინდისიერი ადამიანის მიერ უკან დაბრუნებული ნივთის გამო კომპანიისთვის მიყენებული ზარალი დაბალანსდეს. ამ ფასნამატის გადახდა კი მოუწევს ყველას, ვინც ღირსეულად აბრუნებს პროდუქტს და მათაც, ვინც არაკეთილსინდისიერად იქცევა,“ განაცხადა ლევან მოლაშვილმა.
მოამზადა მაკა ბიბილაშვილმა