„შარშანდელთან შედარებით ერთი ტომარა ფქვილის ღირებულება 15 ლარით არის შემცირებული და მისი ფასი  დღეს 54-55 ლარია“ - ამის  შესახებ, რადიო „კომერსანტის“  გადაცემაში, „კომერსანტის დილა“ პურის მრეწველთა კავშირის თავმჯდომარემ მალხაზ  დოლიძემ განაცხადა. მისი  თქმით ამან შექმნა საშუალება, რომ დაახლოებით 10-12 აპრილიდან სოციალურ პურზე, რომელშიც  ე.წ. ქვის პური იგულისხმება, ფასი 10 თეთრით შემცირდება.

„მე მჯერა, რომ ამას ქსელური მაღაზიები შეასრულებენ, არის მაღაზიები „ორი ნაბიჯი“, „ნიკორა“ და ა.შ. რომლებსაც  პროდუქტი ხელშეკრულებით მიეწოდება და ამ სიტყვას შეასრულებენ,  თუმცა მე არ ვიცი  რამდენად აისახება ეს არაქსელურ, ე.წ. უბნის მაღაზიებში, თუმცა მრეწველობა პურზე ფასს დააკლებს.

თბილისში ყველაზე  გაყიდვადი სწორედ ეს  სოციალური  პურია და დღეში დაახლოებით 350 ტონა ქვის პური იყიდება, ეს  ძალიან მაღალი ციფრია. რაიონებშიც ძირითადად ამ პურს მოიხმარენ“, - აღნიშნა მალხაზ დოლიძემ.

დოლიძემ განმატა, რომ მთავრობის პოზიცია  ხალხის  ინტერესების წინა პლანზე წამოწევაა, თუმცა მისივე  თქმით  სექტორის პრობლემებიც  გასათვალისწინებელია. დოლიძე აღნიშნავს, რომ ენერგორესურსებზე ფასი გაზრდილია.

თაკო კვაჭანტირაძე