საერთაშორისო სავალუტო ფონდმა (IMF) საქართველოს 2022 წლის ეკონომიკური ზრდის პროგნოზი 9%-დან 10%-მდე გაზარდა. 2023 წლიდან კი ინფლაციის და ეკონომიკური ზრდის შენელებას პროგნოზირებს, - ამის შესახებ დღეს ფონდის მისიის ხელმძღვანელმა ჯეიმს ჯონმა განაცხადა. 

 IMF-ის პროგნოზით, ინფლაცია სამიზნე 3%-იან მაჩვენებელს 2024 წელს უნდა დაუახლოვდეს. შედარებით უფრო ოპტიმისტურია ამ მხრივ ეროვნული ბანკის პროგნოზი, რომელიც 3%-თან ინფლაციის დაახლოებას მომდევნო წელს მოელის.

„2022 წელს ეკონომიკის ზრდის პროგნოზი 10%-ია, ხოლო წლის ბოლოს წლიური ინფლაცია 10.5% იქნება. 2023 წლიდან ეკონომიკის ზრდის ტემპის და ინფლაციის შენელებას ველით. საშუალოვადიან პერიოდში ეკონომიკის ზრდა მის პოტენციურ მაჩვენებელს, დაახლოებით 5%-ს დაუახლოვდება. ინფრასტრუქტურაში ინვესტიციების და პროდუქტიულობის გაზრდაზე მიმართული სტრუქტურული რეფორმების დახმარებით. პროგნოზის მიხედვით, საშუალო ინფლაცია სებ-ის სამიზნე, 3%-იან მაჩვენებელზე 2024 წელს შემცირდება.

ოქტომბერში, საქართველოსთან მიმართებით ჩვენი ეკონომიკური ზრდის პროგნოზი 2023 წლისთვის 4% იყო, რაც უცვლელი რჩება. ამას სხვადასხვა ფაქტორი განაპირობებს, ველით გარკვეულ ცვლილებებს, რაც დაკავშირებულია მიგრაციასთან და ასევე სხვა ფაქტორებთან. ვგულისხმობ გართულებულ გარემოს მსოფლიოში, ასევე მსოფლიო ეკონომიკურ ზრდასა და ფინანსურ ვითარებას. ყველა ამ ფაქტორის გათვალისწინებით, 2023 წელს 4%-იან ეკონომიკურ ზრდას ველოდებით.

საშუალოვადიან პერიოდში საქართველოში 2024 წლიდან 5%-იან პოტენციურ ეკონომიკურ ზრდას ველით,” - განაცხადა ჯეიმს ჯონმა.

საერთაშორისო სავალუტო ფონდის მისიამ დღესვე ახალი პროგრამის პირველი მიმოხილვის დასრულების შესახებ განაცხადა. ჯეიმს ჯონის თქმით, საქართველომ დააკმაყოფილა ყველა ის ძირითადი პირობა, რომელიც პროგრამის ფარგლებში იყო გათვალისწინებული. შედეგად, საქართველოსთვის საჭიროების შემთხვევაში დამატებით 30 მილიონი SDR-ი ანუ 38 მილიონი დოლარი გახდება ხელმისაწვდომი.