9 თვის განმავლობაში საქართველოში არის 10,2%-იანი ეკონომიკური ზრდა, ეს არის უპრეცედენტო მთელს ევროპაში, - ამის შესახებ საქართველოს პრემიერ-მინისტრმა ირაკლი ღარიბაშვილმა, მთავრობის სხდომაზე განაცხადა.
მთავრობის მეთაურის თქმით, წლის ბოლომდე არის მოლოდინი, რომ ქვეყანას ორნიშნა ეკონომიკური ზრდა ექნება.
„მე მინდა შევეხო ეკონომიკურ ზრდას. მოგეხსენებათ, რომ მიმდინარე გეოპოლიტიკური გამოწვევების, დაძაბულობის ფონზე ჩვენ ვინარჩუნებთ მაღალ ეკონომიკურ ზრდას ქვეყანაში. 9 თვის განმავლობაში საქართველოში არის 10,2%-იანი ეკონომიკური ზრდა. ეს არის უპრეცედენტო მთელს ევროპაში. ასევე მინდა ვთქვა, რომ გაზრდილია ექსპორტი, 40%-ით და 9 თვეში ზრდამ 37,4% შეადგინა. ექსპორტიდან მიღებულმა შემოსავლებმა 4 მილიარდი აშშ დოლარი შეადგინა.
ტურიზმის აღდგენა მიმდინარეობს სწრაფი ტემპებით. თუ ჩვენ შევადარებთ 2019 წელს, წელს უკვე 97,5%-ით არის აღდგენილი ტურიზმი. აქედან მიღებულმა შემოსავლებმა შეადგინა 2,5 მილიარდი აშშ დოლარი.
არ მინდა წინასწარ პროგნოზი გავაკეთო, მაგრამ წლის ბოლომდე ჩვენი მოლოდინი არის, რომ ჩვენ შევინარჩუნებთ ასეთ მაღალ ეკონომიკურ ზრდას და წლის ბოლოს ველოდებით ორნიშნა ეკონომიკურ ზრდას“, - განაცხადა პრემიერ-მინისტრმა.
შეგახსენებთ, რომ დღეს საქსტატმა ეკონომიკური ზრდის წინასწარი მაჩვენებლები გამოაქვეყნა. საქსტატის წინასწარი შეფასებით სექტემბერში საქართველოს ეკონომიკა 8.8%-ით გაიზარდა - ორგანიზაციის მიერ გამოქვეყნებული ანგარიშის მიხედვით, მიმდინარე წლის 9 თვეში ეკონომიკურმა ზრდამ 10.2% შეადგინა.
სექტემბერში ზრდა დაფიქსირდა შემდეგ დარგებში - ტრანსპორტი და დასაწყობება, ინფორმაცია და კომუნიკაცია, მშენებლობა, ტურიზმი, დამამუშავებელი და სამთო-მოპოვებითი მრეწველობა. კლება დაფიქსირდა უძრავ ქონებასთან დაკავშირებული საქმიანობების დარგებში
საქსტატის თანახმად, სექტემბერში ბიზნეს სექტორის, ანუ დღგ-ის გადამხდელი კომპანიების ბრუვნამ 11.6 მილიარდი ლარი შეადგინა, რაც წინა წელთან შედარებით 19.5%-ით მეტია.