განვითარებადი აზიის ეკონომიკების ოთხი მეხუთედი ციფრული გარემოს გლობალური ინდექსისა და მეწარმეობის ხელშემწყობი სისტემების სიის ბოლოს იკავებს ადგილს, აზიის განვითარების ბანკის (ADB) მიერ შემუშავებული ახალი ინდექსის მიხედვით.

ADB-ში აღნიშნავენ, რომ გაციფრულება აზიისა და წყნარი ოკეანის რეგიონის ბიზნესებისთვის განვითარების დიდ შესაძლებლობას წარმოადგენს. ეს ინოვაციის მამოძრავებელი ძალაა, რასაც გადამწყვეტი მნიშვნელობა აქვს ეკონომიკებისთვის მაღალი შემოსავლის მქონე ეკონომიკის სტატუსის მისაღებად. მას ასევე შეუძლია ეკონომიკები გახადოს უფრო მედეგი, რაც კოვიდ-19-ის პანდემიის დროს გამოჩნდა, როცა მრავალი ბიზნესი ციფრული ტექნოლოგიების დახმარებით გადარჩა. მას ასევე შეუძლია ინკლუზიური ზრდის წახალისება ბიზნესის დაწყების ხარჯების შემცირებით. შეფასების მიხედვით, განვითარებადი აზიის 21 ეკონომიკიდან 17 სიის ბოლოსაა განთავსებული, რაც ხაზს უსვამს ბევრ მათგანში ციფრული მეწარმეობის ხელშეწყობის აუცილებლობას. 

ციფრული მეწარმეობის სისტემების გლობალურ ინდექსში შეყვანილი 113 ეკონომიკიდან საქართველო 50-ე ადგილს იკავებს. რაც შეეხება რეგიონის ქვეყნებს, სომხეთი 58-ე ადგილზეა, აზერბაიჯანი კი მე-60.

სინგაპურს მეწარმეებისთვის მსოფლიოში საუკეთესო ციფრული გარემო და ხელშემწყობი სისტემები აქვს, ნათქვამია გამოცემულ ციფრული მეწარმეობის სისტემების გლობალურ ინდექსში, ხოლო მეორე ადგილზე შეერთებული შტატებია, მესამეზე კი შვედეთი. 

აღნიშნული ინდექსი აფასებს ციფრული მეწარმეობისთვის არსებული გარემოს ხარისხს გაციფრულების რვა მიმართულებით, როგორიცაა: კულტურა, ინსტიტუტები, ბაზრის მდგომარეობა, ადამიანური კაპიტალი, ცოდნა, ფინანსები და კავშირები. ADB-ში განმარტავენ, რომ საერთო ჯამში, ციფრული მეწარმეობის განვითარების კუთხით აზიისა და წყნარი ოკეანის რეგიონის ყველაზე დიდ სისუსტეს არასაკმარისი ხელშემწყობი კულტურა წარმოადგენს. ამის ერთი მაგალითია, ეკონომიკურ პროგრესში მეწარმეების სასიცოცხლოდ მნიშვნელოვანი როლის არასათანადო დაფასება საზოგადოების მხრიდან. ამ მდგომარეობის შეცვლის ერთ-ერთი გზა განათლების გზით მეწარმეების შესახებ საზოგადოებრივი აზრის გაუმჯობესებაა.