„125-ზე მეტი ოჯახი, 2008 წლიდან მოყოლებული, ველით გადახდილი თანხის სანაცვლოდ პირობის შესრულებას და ჩვენი კუთვნილი ბინების მიღებას.
ჯერ ომი და კრიზისი, შემდეგ ხელისუფლებათა ცვლა, შემდეგ კიდევ ათასი სუბიექტური და ობიექტური მიზეზი, მათ შორის, სხვადასხვა საჭირო ნებართვის მუდმივი განახლების ბიუროკრატიული და რუტინული პროცესი და მოვედით დღემდე.
დღეს ყველა ყველაფერზე შეთანხმებული ვართ (მომავალი მობინადრეები, მშენებელი კომპანია, მერია - ერთი გამონაკლისის გარდა ყველა ნებართვის ნაწილში...) და თავისი გადაწყვეტილების გაჭიანურებით პრობლემას ქმნის ერთადერთი მუნიციპალური სამსახური, კერძოდ, „ტრანსპორტისა და ურბანული განვითარების სააგენტო“, რომელიც დღემდე, ყველა დადგენილი, თუ გონივრული ვადის იგნორირებით, უბრალოდ არ იძლევა პასუხს სატრანსპორტო სქემის შეთანხმების შესახებ“, - ამის თაობაზე თბილისში, ჭავჭავაძის გამზირზე ასაშენებელი სახლის (მისამართი: #5ა) დაზარალებული მესაკუთრეები აცხადებენ.
საინიციატივო ჯგუფის წარმომადგენელთა განცხადებით, 15 წელია სახლის აშენებას და ბინებში შესვლას ელოდებიან და ამ დროის განმავლობაში მოუხდათ უამრავი სვხადასხვა სახის დაბრკოლების გადალახვა.
„დღეს ვართ იმ რეალობის წინაშე, რომ ყველა დიდი თუ მცირე პრობლემა დაძლეულია და მშენებლობის დაწყებას აფერხებს საქალაქო სამსახურის, მსუბუქად ვიტყოდი, გულგრილი დამოკიდებულება პრობლემისადმი. არათუ არ ითანხმებენ, პასუხსაც არ იძლევიან (როგორც ჩანს, დადებითი პასუხის გაცემა არ სურთ და უარყოფითის შემთხვევაში იციან, რომ სასამართლოს ძალით მოუხდებათ ვერდიქტის შეცვლა) სატრანსპორტო სქემის დამტკიცების თაობაზე. არადა, 2017 წელს ეს საკითხიც დადებითად იყო გადაწყვეტილი“, - ამბობს დაზარალებულთა ერთ-ერთი წარმომადგენელი.
„იძულებულნი ვართ, საჯარო აქტივობით, კერძოდ, მერიასთან საპროტესტო აქციით, ვაიძულოთ საქალაქო სამსახური, დაუყოვნებლივ მოგვაქციოს სათანადო ყურადღება და გადაგვიწყვიტოს პრობლემა.
აქციები ჩვენი თვითმიზანი არ არის, უბრალოდ,“ტრანსპორტისა და ურბანული განვითარების სააგენტო“, საკითხისადმი საკუთარი უგულისყურობით, ჯერჯერობით, ურთიერთობის სხვა ფორმატს არ ტოვებს. იმედი გვაქვს, ჩვენს აქტივობას, ბატონი მერისა და მისი მოადგილეების მხრიდან, სათანადო რეაგირება მოჰყვება და ჩვენი კონკრეტული, პატარა, მაგრამ ძალიან მნიშვნელოვანი პრობლემა ერთხელ და სამუდამოდ გადაწყდება“, აცხადებენ საინიციატივო ჯგუფში.
საპროტესტო აქცია 12 აპრილს, 14 საათზე, მერიის შენობასთან არის დაგეგმილი. საინიციატივო ჯგუფი მედიას აქციის თაობაზე ინფორმაციის გავრცელებისა და საკუთრივ აქციის გაშუქების თხოვნით მიმართავს.
საინიციატივო ჯგუფთან დაკავშირება შემდეგ საკონტაქტო ნომრებზეა შესაძლებელი: 599 547447; 599 364252; 599 957455