ჯანდაცვის მენეჯმენტის სპეციალისტი ვახტანგ სურგულაძე მიიჩნევს, რომ იმ ვნებათაღელვის მთავარი მიზეზი, რაც რესპუბლიკური საავადმყოფოს რეკონსტრუქციის პროექტმა გამოიწვია, არასწორი კომუნიკაციაა. სურგულაძის თქმით, მთავრობამ ჯერ საავადმყოფოს დანგრევაზე დაიწყო ლაპარაკი და შემდგომ იმის მოფიქრება თუ რა უნდა უყოს სამედიცინო პერსონალს.
სურგულაძის თქმით, შესაძლოა საავადმყოფოს შენობა ნამდვილად ვეღარ აკმაყოფილებს თანამედროვე სტანდარტებს, თუმცა არსებობს სხვადასხვა გზები მაგალითად პარალელურ რეჟიმში იმავე ეზოში ახალი საავადმყოფოს აშენება.
„რესპუბლიკური საავადმყოფოს პრობლემა არის ინფორმაციის არმიწოდება იქ მომუშავე ადამიანებისთვის, ვინც შექმნა ეს საავადმყოფო, ვის მხრებზეც გადაიარა ომებმა, კოვიდმა და ასე შემდეგ. ეს არის წამყვანი საავადმყოფო. გასაგებია რომ საჭიროებს რეკონსტრუქციას, მაგრამ ასე ტელევიზიით რომ გამოდის მინისტრი და იძახის, რომ „ხვალ ჩვენ უნდა დავანგრიოთ საავადმყოფო“ ... ადამიანები ამას ტელევიზიიდან არ უნდა იგებდნენ. გამოსვლები რომ დაიწყო, ახლა ამბობს ერთ კვირაში წარვადგენთ პრეზენტაციასო. უკუღმა უნდა გაკეთდეს? ჯერ პრეზენტაცია, რისკები, როგორ იქნება, ვინ გააკეთებს. ეს კომუნიკაციის მომენტია, კომუნიკაცია არის ყველაფერი.
ბევრი გამოსავალი შეიძლება იყოს, გვერდზე ავაშენოთ საავადმყოფო პარალელურად, ხალხი არ გავუშვათ სამსახურებიდან. რომ ეუბნები სხვა საავადმყოფოებში დაგასაქმებ, ეს ხომ ტყუილია, მე რომ ვარ კერძო საავადმყოფოს დირექტორი, მაწყობს მე ახალი კადრი? ფულს შენ გადაუხდი? ბიუჯეტში რომ არ გიდევს ამ ხალხის ხელფასის ფული? ხალხს ტელევიზიით ელაპარაკებიან, გენერალური დირექტორი არ მიდის და არ ხვდება. რომ ეუბნები 2 წელიწადში ავაშენებო, ვერ ააშენებ, იმიტომ რომ გრიგოლეთიდან სამტრედიამდე ვერ გააკეთეს გზა 10 წელი, გოცირიძის მეტრო კიდევ 3 წელი. რომც მოინდომონ ძალიან რთული ინფრასტრუქტურაა,“- აღნიშნა ვახტანგ სურგულაძემ,
მისი თქმით, ბევრ კითხვებს აჩენს გარანტირებულ ხელფასებთან დაკავშირებით გაცემული დაპირება.
„მისვლით, დალაპარაკებით, გარანტიებით დაითანხმებენ. მაგრამ როცა ჯერ ეუბნები 1 თვის ხელფასს მოგცემო, მერე გამოვარდა გაბუნია და არა, ერთი წლისო. როგორ მისცემ, როცა ბიუჯეტში ფული არაა ჩადებული? საავადმყოფო არის კოლექტივი, ექიმი და ექთანი, ეს ხალხი რომ სხვადასხვა კლინიკებში წავა, ერთი გუნდი ვეღარ იქნება და შენ ორ წელიწადში შეკრებ ამას? არც შეკრებ და ვერც შეკრებ. ამ პროექტს არც აპირებდნენ, ახლა მორჩნენ, დაახლოებით 120 ათასი დოლარი დახარჯეს ახალი განყოფილების გარემონტებაზე, თუ დანგრევას აპირებდნენ რატომ გაარემონტეს? ეს არის, პირობითად ვამბობ, გუშინწინ მიღებული გადაწყვეტილება, მოდი დავანგრიოთ, ეს ხალხი სადმე გადავიყვანოთ, სადღაც ვიშოვოთ ფული, ხელფასები მივცეთ, მერე თვითონაც მოჰბეზრდებათ, ვიღაც თვითონ იშოვის, ვიღაც ამერიკაში გაიქცევა...
რომ უთხრან, ასეთი პროექტია, ამდენ ხანში იქნება, შენ წახვალ ამა და ამ საავადმყოფოში სამუშაოდ, უკვე მოლაპარაკებული მაქვს - დათანხმდება, მაგრამ რომ ასე ეუბნები ადამიანს, ვისაც ბანკის სესხი აქვს, ბავშვის გადასახადები აქვს, გასაგებია გამოიწვევს ასეთ რეაგირებას,“- აცხადებს სურგულაძე.