2022 წლის განმავლობაში აზარტული თამაშების სექტორმა სახელმწიფო ბიუჯეტში რეკორდული მოცულობის თანხა, 739 მილიონი ლარი გადაიხადა - ამის შესახებ პარლამენტში გამართულ მოსმენაზე ფინანსთა მინისტრმა ლაშა ხუციშვილმა განაცხადა.

აზარტული თამაშების კომპანიებისგან მიღებული გადასახადების ზრდა 2022 წლის 1-ელი მარტიდან დაბეგვრის სისტემის ცვლილებას უკავშირდება. კერძოდ ბიზნესს უწევს მოგების გადასახადის სახით მიღებულ ფსონებსა და გაცემულ მოგებას შორის სხვაობის 10%, ანუ GGR-ის 10% გადაიხადონ. ამ ცვლილების შედეგად, გასულ წელს სექტორის მიერ გადახდილი გადასახადების მოცულობა მნიშვნელოვნად გაიზარდა. 2022 წელს რადიკალურად შეიცვალა აზარტული თამაშების რეგულირებისა პირობები და 25 წლამდე პირებს თამაში აეკრძალათ, ასევე აიკრძალა აზარტული თამაშების რეკლამირებაც.

სათამაშო ბიზნესის ასოციაციის ადმინისტრაციის ხელმძღვანელი გიორგი მამულაიშვილი ამბობს, რომ რეგულაციების დაწესებიდან 13 თვის თავზე გაჩნდა არასტაბილური და არალეგალური ბაზარი.

„13 თვის თავზე ბაზარმა განიცადა ძლიერი რყევები. გარდა ამისა სოციალური კუთხით მივიღეთ ძალიან არასტაბილური და არალეგალური ბაზარი, ნაწილობრივ, რაც გამოიხატება იმაში რომ ადამიანები რომელთაც შეეზღუდათ ადგილობრივ თამაშებში ჩართულობა გადავიდა უცხოურ არალეგალურ ბაზარზე. შარშან დაახლოებით მილიარდ ლარამდე მოხდა ქვეყნიდან გადინება, ეს არ ნიშნავს რომ ამდენი თანხა დარჩა უცხოეთში მაგრამ არალეგალური საიტები მუშაობენ საკმაოდ მაღალი მარჟით და ეს მარჟა 40-45$-ია, რაც იმას ნიშნავს რომ ამდენივე პროცენტი მათთან დარჩა. 

როდესაც ბაზარი არასტაბილურია, არალეგალური ბიზნესის დაინტერესება ბაზრით აქტიურად ხდება და 13 თვის თავზე ჩვენ დავინახეთ , რომ ძალიან ბევრი უცხოური ოპერატორი დაინტერესდა საქართველოთი. 135 ადგილობრივი ოპერატორი ოპერირებდა რეგულაციებამდე და დღეს 86 დარჩა. რაც შეეხება არალეგალურ საიტებს, ჩემი ინფორმაციით 720 ასეთი ვებ-გვერდი ცდილობს საქართველოს ბაზარზე შემოსვლას“, — ამბობს  გიორგი მამულაიშვილი.