რუსეთს 2 300 ტონამდე, ანუ, დაახლოებით, 140 მლრდ დოლარის ოქროს მარაგი აქვს, რაც მსოფლიოში ყველაზე დიდი მოცულობაა.
Business Insider-ის შეფასებით, მოსკოვმა ძვირფასი ლითონის უზარმაზარი მარაგი ბოლო ათწლინახევრის განმავლობაში შექმნა და „ქვეყნის ეკონომიკური დაზღვევის ერთგვარ პოლისად“ განიხილებოდა. თუმცა სანქციები რუსეთისთვის, ნავთობის მსგავსად, ოქროს რეალიზებასაც მეტად ართულებს.
„სწორედ ასეთი სიტუაციისთვის დაგროვეს მათ თავისი ოქრო, თუმცა თუ არავინ იყიდის, ის აზრს კარგავს," - აცხადებს ირლანდიის კორკის უნივერსიტეტის ბიზნეს სკოლის ლექტორი, ფერგალ ო'კონორი.
გასულ კვირას ლონდონის ოქროს ბაზარმა, რომელიც მსოფლიოში ყველაზე მნიშვნელოვანი ცენტრია, რუსეთის გადამამუშავებელი ქარხნებიდან ოქროს ზოდების შესყიდვა აკრძალა, რითიც, ფაქტობრივად, რუსული ოქროსთვის გლობალური ვაჭრობა დახურა.
ამ ნაბიჯს აშშ-ს სენატის ახალი კანონპროექტი მოჰყვა, რომელიც აშშ-ს მოქალაქეებს რუსული ოქროთი ნებისმიერი ტრანზაქციას უკრძალავს.
მენის შტატის დამოუკიდებელი სენატორის, ანგუს კინგის შეფასებით, რუსეთის ოქროს უზარმაზარი მარაგი არის ერთ-ერთი იმ დარჩენილ მცირე აქტივებს შორის, რომელიც პუტინს შეუძლია, ქვეყნის ეკონომიკის კიდევ უფრო დაცემის თავიდან ასაცილებლად გამოიყენოს.
„ამ რეზერვების სანქცირებით ჩვენ რუსეთს მსოფლიო ეკონომიკიდან კიდევ უფრო იზოლირებულს გავხდით და პუტინის ძვირადღირებული სამხედრო კამპანიის დაფინანსებას გავართულებთ,“ - აცხადებს ამერიკელი სენატორი.
თუმცა რუსეთის ცენტრალური ბანკის საპასუხო განცხადებაში ნათქვამია, რომ ოქროზე შიდა მოთხოვნა საერთაშორისო მყიდველების გარეშეც მაღალია. ბანკმა საკრედიტო ინსტიტუტებთან ოქროს რეგულარული შესყიდვები შეაჩერა, რომ მოსახლეობის მოთხოვნას კონკურენცია არ გაუწიოს, რადგან ხალხი გაუფასურებული რუბლის ოქროს ზოდებში გადაცვლას ცდილობს.
Credit Suisse-ის სტრატეგი, ზოლტან პოზსარი აცხადებს, რომ თუ რუბლმა დოლართან მიმართებაში ვარდნა განაგრძო, რუსეთს შეუძლია, ოქროს მარაგი რუბლში ფიქსირებულ ფასად გაყიდოს, რაც ეკონომიკურ დაცემას დროებით შეაჩერებს და ერთგვარი „ღუზის“ ფუნქციას შეასრულებს.
bpn.ge