15 თებერვლიდან, ძალაში შევიდა რეფორმა მედიკამენტების რეფერენტული ფასების შესახებ. რაც იმას ნიშნავს, რომ ფარმაცევტულ კომპანიებს წამლების ზღვრულ ფასებზე ძვირად გაყიდვის უფლება არ ექნებათ.
რადიო „კომერსანტის“ ეთერში ფარმაცევტული კომპანიების წარმომადგენელთა ასოციაციის დირექტორმა ირაკლი მარგველაშვილმა განაცხადა, რომ დაკვირვების პერიოდი კიდევ 15 მარტამდე გრძელდება და 15 მარტის შემდეგ მედიკამენტების დადგენილ ფასებზე ძვირად რეალიზაცია დასჯადი იქნება.
„15 იანვარს დაახლოებით 1200 დასახლების მედიკამენტებზე რეფერენტული ფასები გამოქვეყნდა. რეფერენტული არის მაქსიმალურად დასაშვები ფასი, რა ფასშიც შეიძლება მედიკამენტი გაიყიდოს. კომპანიებს მიეცათ 2 კვირა, რომ გამოქვეყნებულ ფასებთან დაკავშირებით სამინისტროში კომენტარები, პრეტენზიები და შენიშვნები მიეწოდებინა. ამ კომენტარების გაცვლის პერიოდი 1 თვეა. დაკვირვების პერიოდი კიდევ 15 მარტამდე გრძელდება და 15 მარტის შემდეგ მედიკამენტების დადგენილ ფასებზე ძვირად რეალიზაცია დასჯადი იქნება“, - განაცხადა ირაკლი მარგველაშვილმა. მისი თქმით, 15 თებერვლიდან ჯერ კიდევ ყველა მედიკამენტზე არ არის რეფერენტული ფასი. საბოლოო სურათს 15 მარტის შემდეგ მივიღებთ.
ამ ეტაპზე საუბარია ქრონიკულ და ონკოლოგიურ მედიკამენტებზე. ორიენტირი იყო ის დაავადებები, რომელთაც სახელმწიფო საყოველთაო ჯანდაცვის პროგრამის ფარგლებში აფინანსებს და ამას კიდევ 10 ონკოლოგიური დასახელების პრეპარატი დაემატა.
ირაკლი მარგველაშვილის თქმით, მედიკამენტებზე ფასების 40%-მდე ზრდა არ ნიშნავს, რომ ყველა წამალი 40%-ით გაიაფდება. ზოგი შეიძლება საერთოდ არ გაიაფდეს, რადგან მას შეიძლება დაბალი ფასნამატი ჰქონდეს.
„პრეპარატებზე ფასების კლების რამდენიმე კომპონენტი არსებობს. ესენია: მოწოდების ფასის შემცირება; მარჟის, ფასნამატის შემცირება და მესამე - ოპერატიული და სხვა დამატებითი ხარჯების შესამცირებლად რესურსების მოძიება, რომ მერე ამის დახმარებით მოხდეს წამლებზე ფასების კლება. ამ 3 კომპონენტიდან რომლის ხარჯზე მოხდება კონკრეტულ მედიკამენტზე ფასის შემცირება ინდივიდუალურად განიხილება,“ - განაცხადა ირაკლი მარგველაშვილმა.