საქართველოში ავტოდაზღვევის ბაზრის ჩამორჩენის ძირითად მიზეზად კანონმდებლობის არქონა მიიჩნევა. სადაზღვევო ასოციაციის ხელმძღვანელი დევი ხეჩინაშვილი ,,კომერსანტთან“ ამბობს, რომ ავტომფლობელების სამოქალაქო პასუხისმგებლობის ე.წ. მესამე პირის მიმართ პასუხისმგებლობის სავალდებულო დაზღვევის ამოქმედების შესახებ გვიანდება კანონპროექტი, რომელზეც პირდაპირ არის დამოკიდებული სადაზღვევო ინდუსტრიის განვითარება.

შესაბამისი კანონპროექტი პარლამენტში განსახილველად 2018 წლის ბოლოს შევიდა, თუმცა კანონმდებლების ყურადღება ჯერჯერობით ვერ მიიპყრო.ხეჩინაშვილის ვარაუდით, ყველა პირობაა, რომ კანონპროექტი წელს განიხილონ და უკვე 2022 წლიდან შევიდეს ძალაში. წინააღმდეგ შემთხვევაში, როგორც დევი ხეჩინაშვილი აღნიშნავს, სადაზღვევო ბაზარი რეალურად ვერ განვითარდება.

,,ავტოდაზღვევის ბაზარზე ნამდვილად ცუდი ვითარებაა. 7%-იანი მაჩვენებელი ნიშნავს, რომ სექტორი დიდ ჩამორჩენას განიცდის. მდგომარეობის გამოსწორება კი სავალდებულო ავტოდაზღვევის შემოღებამდე შეუძლებელია. ახლა ინდუსტრია გაძლებაზეა, რომ ამ კრიზისულ ვითარებას თავი დააღწიოს. აშკარაა, რომ ჯანმრთელობის დაზღვევა, რომელსაც ჩვენი ბიზნესის 50%-ზე მეტია უკავია, მოგება-წაგების ზღვარზეა. ვცდილობთ, რომ ინტენსიურ და კონკურენტულ გარემოში პოზიციები შევინარჩუნოთ და გავზარდოთ კიდევაც, ამისთვის კი ახალი პროდუქტების შეთავაზება ბაზრისთვის სასიცოცხლოდ მნიშვნელოვანია. ყოველ წელს ველოდებით, რომ ავტომობილების მფლობელთათვის სავალდებულო ავტოდაზღვევა ამოქმედდება, როგორც ეს მთელ მსოფლიოშია. ჩვენი ინდუსტრიის განვითარების პერსპექტივა ამაზეა დამოკიდებული, - ამბობს ხეჩინაშვილი.

რაც შეეხება უკვე დაზღვეული მანქანების მოცულობას, არსებული მონაცემით, საქართველოში თითქმის 1,5 მილიონი მანქანაა რეგისტრირებული და აქედან დაზღვეულთა რაოდენობა 100 000-საც არ შეადგენს.

,,ავტოდაზღვევის ვალდებულება ასოცირების ხელშეკრულებით გვაქვს აღებული. სიტუაციის გამოსწორებას არ უნდა ველოდოთ, სანამ ავტოდაზღვევის ვალდებულება საკანონმდებლო დონეზე არ განისაზღვრება. ეს გზა ყველა თანამედროვე სახელმწიფომ გაიარა. ჯერჯერობით დაზღვევის დიდი წილი სწორედ კორპორაციული მანქანებია, სახელმწიფომ ისწავლა ამის გამოყენება, ბიუჯეტს ასტიმულირებს და კორპორაციული კლიენტებისთვისაც მისაღებია, - დასძენს ხეჩინაშვილი.

ავტომფლობელების სამოქალაქო პასუხისმგებლობის ე.წ. მესამე პირის მიმართ პასუხისმგებლობის სავალდებულო დაზღვევის კანონპროექტი პარლამენტში განსახილველად 2018 წლის ბოლოს შევიდა, თუმცა კანონმდებლების ყურადღება ჯერჯერობით ვერ მიიპყრო.

დაზღვევის ზედამხედველობის სამსახურის მონაცემებით, საქართველოში 98,594 ავტომობილია დაზღვეული, რაც საერთო ავტოპარკის 7%-ია.

სტატისტიკის მიხედვით, 2020 წლის ანალოგიურ პერიოდში დაზღვეული იყო 92,753 ავტომობილი, რაც მთლიანი ავტოპარკის ასევე 7%-ს შეადგენდა.

მარი ჩიტაია