საქართველოს მუნიციპალური განვითარების ფონდი 15 საფეხბურთო მოედნებზე ბალახის საფარის დაგებისთვის (თანმდევი მომსახურებით - მოვლით და ტექნიკური მომსახურებით) 12 100 000 ლარს დახარჯავს. აღნიშნულ სერვისს კი ფონდი გამარტივებული შესყიდვის წესით მიიღებს და ამას გადაუდებელი აუცილებლობით ასაბუთებს.
ირკვევა, რომ ბალახის საფარის სასწრაფო წესით მოწყობა უეფას 21-წლამდე ევროპის ჩემპიონატის ჩემპიონატის მასპინძლობისთვის სჭირდება, რომელიც 2023 წელს 21 ივნისიდან 8 ივლისის ჩათვლით საქართველოს სამ ქალაქში გაიმართება.
მიზეზი თუ რატომ გადაწყდა სერვისის შეძენისთვის გამარტივებული შესყიდვა არის ის, რომ ჩემპიონატის ჩასატარებლად, აღმოსავლეთ საქართველოს საფეხბურთო მოედნებისთვის განკუთვნილი ბალახის საფარის მოწყობის მიზნით გამოცხადებული CON220000566 კონსოლიდირებული ტენდერი დასრულდა სტატუსით - „დასრულებულია უარყოფითი შედეგით, ხოლო დასავლეთ საქართველოს საფეხბურთო მოედნებისთვის განკუთვნილი ბალახის საფარის მოწყობის მიზნით გამოცხადებული CON220000565 კონსოლიდირებული ტენდერი შეწყდა.
მიუხედავად იმისა, რომ ჩემპიონატი ივლისში ტარდება უეფას მოთხოვნით სატესტო მატჩი 2023 წლის მაისში უნდა გაიმართოს, შესაბამისად სპორტული ინფრასტრუქტურა უკვე მაისისთვის უნდა იყოს მზად. უეფას წარმომადგენლები მუდმივ მონიტორინგს ატარებენ თუ როგორ მიმდინარეობს საფეხბურთო სტადიონების რეაბილიტაციის პროცესი, რომ დათქმულ ვადაში მოესწროს სპორტული ღონისძიების ჩატარება.
აღნიშნულის გათვალისწინებით შესყიდვის დაყოვნებით შეუძლებელი იქნება დათქმულ ვადაში ტურნირის ჩატარება და ქვეყანა ევროპის ყველაზე მნიშვნელოვანი სპორტული ღონისძიების მასპინძლობის უფლების დაკარგვის საფრთხის წინაშე დადგება, რაც გამოიწვევს საქართველოს იმიჯის შელახვას და მომავალში შესაძლოა საერთაშორისო საფეხბურო ღონისძიებების მასპინძლობის შესაძლებლობაც დავკარგოთ.
CON220000566 და CON220000565 კონსოლიდირებული ტენდერების შესაბამისი შედეგების დადაგომისთანავე შესაბამისი მოლაპარაკებები გაიმართა უეფას, ა(ა)იპ საქართველოს ფეხბურთის ფერერაციასა და საქართველოს ფეხბურთის ფედერაციის მიერ კონკრეტულად ამ პროექტისთვის დაქირავებული საერთაშორისო კომპანიის „Labosport“-ის წარმომადგენლებთან.
მოლაპარაკების შედეგად მიღწეული იქნა ეკონომია და სს სუპპორტ ინ სპორტ ეასტერნ ეუროფე ინშაათ ვე სპორ ჰიზმეთლერი, ბათუმის ფილიალის კომპანიასთან გაფორმდა ხელშეკრულება, რომელიც რეგისტრირებულია სახელმწიფო შესყიდვების სააგენტოს ერთიანი ელექტრონული სისტემის CMR მოდულში
სს სუპპორტ ინ სპორტ ეასტერნ ეუროფე ინშაათ ვე სპორ ჰიზმეთლერი, ბათუმის ფილიალი (“Branch of JSC Support in Sport Eastern Europe Inshaat ve Spor Hezmetler in Batumi”) წარმოადგენს SIS GROUP-ის დანაყოფს. კომპანია, Support in Sport Group (IRL) Limited, სრულად საერთაშორისო, FIFA-ს ლიცენზიანტი და მსოფლიოს წამყვანი კომპანიაა. ის ფლობს ოფისებს დიდ ბრიტანეთში, ირლანდიაში, თურქეთში, ნიდერლანდებში, ახლო აღმოსავლეთში და საქართველოში.