„100 000-დან 150 000 ლარამდე გრანტებით დაფინანსებული გვაქვს 175 სტარტაპი და მათ მიერ მოზიდული ინვესტიციების ჯამური რაოდენობა შეადგენს 95 მლნ. დოლარს ანუ მათმა უმრავლესობამ შეძლო მოეზიდა დამატებითი ინვესტიცია“,— ამის შესახებ ლევან ბოძაშვილის საავტორო გადაცემაში „ნეირონი“, საქართველოს ინოვაციებისა და ტექნოლოგიების სააგენტოს (GITA) დირექტორის მოადგილე თორნიკე ჯობავამ ისაუბრა.

თორნიკე ჯობავას თქმით, GITA ეხმარება სტარტაპებს, თუმცა თავის მხრივ სტარტაპები ეხმარებიან მათ იმ მიზნის მიღწევაში რომელიც ადამიანების უკეთეს ყოფას გულისხმობს.

„ჩვენი მთავარი მიზანი არის ადამიანი და GITA-ს მთავარი მისიაა, რომ ადამიანის ცხოვრება გავხადოთ უკეთესი, შესაბამისად ჩვენი ყველა პროგრამა ამისკენ არის მიმართული. GITA ეხმარება სტარტაპებს, თუმცა თავის მხრივ სტარტაპები გვეხმარებიან სწორედ იმ მიზნის მიღწევაში რომელიც ადამიანების უკეთეს ყოფას გულისხმობს.

მეტწილად გვიცნობენ როგორც ორგანიზაცის, რომელიც სტარტაპებს აფინანსებს, თუმცა ამის გარდა ძალიან ბევრი საგანმანათლებლო კომპონენტი არის ჩადებული, მათ შორის ის, რომ ეს შერჩეული სტარტაპები გადიან „მენტორშიპის“ პროგრამას, ასევე გვაქვს საინტერესო ბანაკები, აქსელერაციის პროგრამები. GITA-ს აქვს აგრეთვე ბევრი ტრენინგ პროგრამა, ერთ-ერთი ყველაზე დიდი და მოთხოვნადი, რომელიც ახლაც მიმდინარეობს არის 3000 IT სპეციალისტის გადამზადების პროგრამა, სადაც არის 45 მიმართულება რომელიც ფაქტობრივად ყველაფერს ფარავს.

ჩვენი მიზანია შევქმნათ შესაძლებლობები და გვინდა რომ ამ ინიციატივაში კერძო სექტორიც ჩაერთოს, რადგან მართალია კარგია როცა სახელმწიფო რაღაცას აკეთებს, მაგრამ როცა მას კერძო სექტორი აკეთებ ეს უფრო მნიშვნელოვანია“, — აღნიშნა თორნიკე ჯობავამ.

შეზღვებზე საუბრისას თორნიკე ჯობავამ აღნიშნა, რომ ყველაზე დიდი შეზღუდვა რაც საქართველოში არის ეს არის ბაზრის სიმცირე.

„პატარა ქვეყანა და პატარა ბაზარი ვართ, შესაბამისად მთავარი არის ის, რომ არ ვიფიქროთ ლოკალურად, არამედ ვიფიქროთ გლობალურად. ჩვენ სტარტაპებს პირველ რიგში ვურჩევთ, რომ ასე მოიქცნენ და როგორც კი საქართველოში მცირე წარმატებას მიღწევენ ვეუბნებით გავიდნენ გლობალურ ბაზარზე. 

უცხოელი პარტნიორებისთვის მნიშვნელოვანია იმის დანახვა, თუ რა კონტრიბუციას ახდენს სახელმწოფო, ამიტომ იმისათვის რომ პატარა ქვეყანაში ის ჩამოვიდეს მნიშვნელოვანია დაინახოს სახელმწოფოს მხარდაჭერა. შესაბამისად ჩვენს 650 000 ლარიან გრანტებში ჩადებული გვაქვს ეს იდეა, რომ 50%-ს სახელმწიფო აფინანსებს და დანარჩენი კი თვითონ სტარტაპმა უნდა მოეზიდოს.

ჩვენი ქვეყნის მთავარი სიმდიდრე არის ადამიანი და ვფიქრობ, რომ ადმიანში უნდა ჩავდოთ ჩვენი მთელი რესურსი და შევხედოთ მას როგორც ინოვაციების საბადოს, საიდანაც შესაძლებელია სხვადასხვა ტიპის ინოვაციების ამოღება“, — ამბობს თორნიკე ჯობავა.