17 იანვრიდან სოციალური სააგენტოს 390 თანამშრომელი გაფიცვას იწყებს. მათი მოთხოვნა ხელფასის 100%-ით გაზრდაა. როგორც სოლიდარობის ქსელის იურისტი, დავით თომსარაშვილი აცხადებს, ჯანდაცვის სამინისტროსთან მოლაპარაკებები წარუმატებლად დასრულდა და პროტესტი იქამდე გაგრძელდება, სანამ მოთხოვნები სრულად არ დაკმაყოფილდება.
„სოციალური მომსახურების სააგენტოს თანამშრომლებს ჰქონდათ და აქვთ კოლექტიური დავა სააგენტოსთან. ეს ადამიანები წლების განმავლობაში ითხოვენ ღირსეულ სამუშაო პირობებს და ღირსეულ ანაზღაურებას. სააგენტო ამდენი ხნის მანძილზე არასერიოზულად უდგება ჩვენს პროტესტს, რამაც შესაბამის შედეგამდე მიგვიყვანა“,- აცხადებს თომსარაშვილი.
მისი განმარტებით, 12 წელია სოციალური აგენტების ხელფასი არ გაზრდილა.
„გაზრდილი ინფლაციის პირობებში აუცილებელია, რომ მათ ჰქონდეთ ღირსეული სამუშაო პირობები, კერძოდ აუნაზღაურდეთ სატრანსპორტო ხარჯები და ჰქონდეთ სადაზღვევო პაკეტიც“,- აღნიშნავს იურისტი.
სოციალური მომსახურების სააგენტოს საკითხთან დაკავშირებით კომენტარი ამ დრომდე არ გაუკეთებია.
სოციალური მომსახურების სააგენტოს თანამშრომლების გაფიცვის საკითხს ეხმიანება "სტრატეგია აღმაშენებლის" სოციალური მიმართულების ხელმძღვანელი. თეონა ჭალიძეს მიაჩნია, რომ ამ ადამიანებს უკვე წლებია ატყუებენ და სწორედ ამიტომ უკვე მერამდენედ უწევთ საკუთარი უფლებების დასაცავად გამოსვლა. ჭალიძის თქმით სოციალური აგენტების მოთხოვნები სრულად ლეგიტიმური და სამართლიანია და ჯანდაცვის სამინისტრომ აუცილებლად უნდა დააკმაყოფილოს
"სოციალური აგენტები არაერთხელ მოატყუეს ჯანდაცვის მინისტრებმა, ისინი სოციალურად დაუცველთა ბაზაში მოხვედრის ზღვარზე ლამის თავად არიან. მათი ყველა მოთხოვნა უნდა დაკმაყოფილდეს ჯანდაცვის სამინისტროს მიერ. მოთხოვნები ლეგიტიმური და სამართლიანია. 390-მდე დასაქმებული ითხოვს: გაწეული სამუშაოს ტარიფების და სამგზავრო ხარჯის ანაზღაურების გაზრდას, დეკრეტული შვებულების სრულყოფილ ანაზღაურებას, ჯანმრთელობის დაზღვევას, ბიულეტენზე ყოფნის დროს სამუშაო ანაზღაურების შენარჩუნებას და პროფესიულ კავშირთან კოლექტიური ხელშეკრულების დადებას. სოლიდარობას ვუცხადებ სოციალური მომსახურების სააგენტოს თანამშრომლებს, სოციალურ აგენტებს, რომლებიც უკვე მერამდენედ იწყებენ გაფიცვას თავიანთი შრომითი უფლებებისთვის, რადგან ამ ადამიანებს წლებია უკვე ატყუებენ და არაფრად აგდებენ. ვნახოთ რა რეაქცია ექნება ექიმების ოჯახში გაზრდილ, ხუთი შვილის მამას ჯანდაცვის მინისტრის ამპლუაში სოციალური აგენტების გაფიცვაზე" - თეონა ჭალიძე
სოციალური სააგენტო
