საქართველოში მოსახლეობის მორიგი აღწერა 2024 წელს ჩატარდება. ბოლო აღწერიდან დღემდე მოსახლეობის რიცხოვნობა 25 ათასითაა შემცირებული. საქსტატის ცნობით 2022 წლის 1-ლი იანვრის მდგომარეობით ქვეყანაში 3.689 ათასი ადამიანი ცხოვრობდა, რაც დამოუკიდებელი საქართველოს ისტორიაში ყველაზე დაბალი მაჩვენებელია. უარყოფითმა მიგრაციულმა სალდომ 2011 წლის შემდეგ 20 ათასს პირველად გადააჭარბა.

საბჭოთა კავშირში ჩატარებული ბოლო აღწერით 1989 წელს საქართველოში 5.4 მლნ ადამიანი ცხოვრობდა. დამოუკიდებლობის მოპოვების შემდეგ 1 მლნ-ზე მეტი ადამიანი ემიგრაციაში წავიდა. ოკუპირებულ რეგიონებში, რომლებიც ბოლო ორმა აღწერამ ვერ გაითვალისწინა ჯამში დაახლოებით 300 ათასი ადამიანი ცხოვრობს.

ჯერ კიდევ პანდემიამდე 2019 წელს წლიური ბუნებრივი მატების მაჩვენებელი 4-5 ათასიდან 1600-მდე შემცირდა, თუმცა დადებითი სალდო ნარჩუნდებოდა, 2020 წელს სიკვდილიანობამ შობადობას 4000-ით, ხოლო 2021 წელს 14 000-ით გადააჭარბა. კიდევ უფრო მაღალი უარყოფითი მიგრაციული სალდოს გამო 2021 წელს ჯამში საქართველოს მოსახლეობა 40 000-ით შემცირდა, რაც ადრეული 90-იანების შემდეგ ყველაზე დიდი კლებაა.

არსებობს, მოსაზრება, რომ მოსახლეობის კლება შობადობის შემცირებითაა გამოწვეული, რაც მეტწილად მცდარია. ბოლო 20-25 წლიან პერიოდში ბუნებრივი მატება ნულთან იყო მიახლოებული და უმეტესად აჭარბებდა კიდეც, სამაგიეროდ 1994 წლიდან დღემდე, დადებითი მიგრაციული სალდო მხოლოდ 2020 წელს აღინიშნა, როდესაც პანდემიის გამო ქვეყანაში 15 ათასით მეტი ადამიანი დაბრუნდა ვიდრე გავიდა. წასვლის მსურველებმა უბრალოდ ვერ შეძლეს საზღვრის გადაკვეთა.

1991-1993 წლების შესახებ საქსტატზე ინფორმაცია არ მოიპოვება, 1994 წლის მოსახლეობა 4.9 მლნ-დ არის განსაზღვრული. თუ ეს მონაცემიც სწორია და 1989 წლის აღწერაც, მაშინ გამოდის, რომ 1991-1993 წლებში საქართველოს მოსახლეობა 0.5 მლნ-ით შემცირებულა.

1994 წელს უარყოფითმა მიგრაციულმა სალდომ 195 ათასი შეადგინა, 1995 წელს 176 ათასი, 1996 წელს 169 ათასი, 1997 წელს 127 ათასი. ამის შემდეგ ვარდნის ტემპი კლებულობს, თუმცა 2020-ის გამოკლებით 0-ს არასდროს ასცილებია.

2002 წლის აღწერით მოსახლეობა 4.3 მლნ-ს შეადგენდა, თუმცა 2014 წლის აღწერამ ცხადყო რომ ს რიცხვი არასწორი იყო და მონაცემი 300 ათასით დაკორექტირდა. დღევანდელი მონაცემით 20 წლის წინ საქართველოს მოსახლეობა 4 მლნ-ს უდრიდა და არა 4.3 მლნ-ს.