Pasha Bank-ის დირექტორთა საბჭოს თავმჯდომარემ და გენერალურმა დირექტორმა ნიკოლოზ შურღაიამ რადიო „კომერსანტის“ დილის ეთერში Pasha Bank-ის და „რებანკის“ საქმიანობა შეაჯამა და განაცხადა, რომ 2022 ბანკი წელს დაგეგმილ მაჩვენებლებზე უკეთ ასრულებს ყველა ძირითადი პარამეტრით, მათ შორის სესხების და დეპოზიტების ზრდის, ასევე შემოსავლიანობის თვალსაზრისით. მოსალოდნელი წლიური 20-25%-იანი ზრდის პირობებში, რამდენიმე წელიწადში ბანკის საბაზრო წილი გაორმაგდება.
„ჩვენთვის 2022, დაგეგმილ მაჩვენებლებთან შედარებით კარგი წელი იყო. ბანკი მნიშვნელოვნად გაიზარდა, საკრედიტო პორტფელს 23%-იანი ზრდა ჰქონდა, მათ შორის „რე ბანკის“ პორტფელი გაორმაგდა. ზარალი 3 მლნ ლარით უფრო ნაკლები იქნება, ვიდრე მიმდინარე წელს გვქონდა დაგეგმილი.
მომავალ წელს ჩვენი ფოკუსი კვლავ ბანკის მოცულობითი ზრდისკენ იქნება მიმართული. საჭირო მასშტაბის მიღწევამდე მომგებიანობა უფრო ნაკლები მნიშვნელობისაა და ამიტომ, მომავალი წელი ზარალიანი დავგეგმეთ. მომგებიანობას კლიენტების სიმრავლე და პროდუქტების შემდგომი გაუმჯობესება აუცილებლად მოიტანს და ამას 2024 წლიდან ვგეგმავთ. მომავალ წელს სტაბილური ზრდის გაგრძელებას ვგეგმავთ და ვიმედოვნებთ, რომ ყოველწლიურად არანაკლებ 20-25%-იან ზრდას მოვახერხებთ უახლოეს წლებში“ - განაცხადა ნიკოლოზ შურღაიამ
Pasha Bank-ის გენერალურმა დირექტორი კმაყოფილია გუნდის მუშაობით, კლიენტებს, რომელთა რიცხვი ათასობით იზრდება ყოველთვიურად, მადლობას უხდის ერთგულებისთვის და მომავალ წელს კიდევ უფრო საინტერესო მომსახურებას, ახალ პროდუქტებსა და სტაბილურობას ჰპირდება.
„ჩვენს კლიენტებს ყველას დიდი მადლობა მინდა ვუთხრა ერთგულებისთვის, წელს ათი ათასობით ადამიანი შემოგვიერთდა, განსაკუთრებით „რებანკში“ და მინდა მომავალ წელს მათ კიდევ უფრო უკეთეს მომსახურებას, ახალ საინტერესო პროდუქტებს და მათი ფულის კარგად და მომგებიანად მოვლას დავპირდე.
ყველაზე მთავარი, რასაც ჩვენი მომხმარებელი ელის, კლიენტისადმი გულით მიდგომაა. ადამიანებს სურთ ბანკში თავისი პარტნიორი იხილონ, ისეთი ადამიანების ჯგუფი დაინახონ, ვინც მათზე გულითადად და რეალურად იზრუნებს, ანუ მომხმარებლის ინტერესს საკუთარ ინტერესთან გააიგივებს“, - განაცხადა შურღაიამ.
მოამზადა მაკა ბიბილაშვილმა