საქართველოს საექსპორტო ათეულში ფეროშენადნობები მეორე ადგილზეა. 2022 წლის ორი კვარტლის მონაცემებით, ქვეყნიდან $295,6 მილიონის ფეროშენადნობი გავიდა. ამ პროდუქტის წილი მთლიან ექსპორტში 15,7% შეადგენს. 2021 წლის იანვარ-ივნისში კი ექსპორტის მაჩვენებელი $186,3 მილიონს შეადგენდა და მთლიანი ექსპორტის 13,5% იყო. საქართველოდან ფეროშენადნობების ექსპორტის შემცირების ტენდენცია, მსოფლიო ბაზარზე პროდუქტზე მოთხოვნა და ფასის შემცირებამ გამოიწვია.

საქართველოში ფეროშენადნობების მწარმოებელ კომპანიებს შორის, „ჭიათურმანგანუმ ჯორჯია“ მეორე პოზიციას იკავებს. 2021 წლის ფინანსური ანგარიშის თანახმად, კომპანიის შემოსავალი 189 მილიონი ლარი იყო, ხოლო წმინდა მოგება - 74 მილიონი ლარი. საერთაშორისო ბაზარზე არსებული კლების ტენდენციის მიუხედავად, კომპანიის შემოსავალი 2020 წელთან შედარებით 200%-ით არის გაზრდილი. კომპანიის აქტივები კი 105.6 მილიონ ლარს შეადგენს.

ანგარიშის თანახმად, კომპანიის ჯამური სიმძლავრე წლიურად 46,200 ტონას შეადგენს. 2021 წელს კომპანიის წარმოებული ერთი ტონა საქონელი 4,575 ლარად იყიდებოდა. კომპანია რამდენიმე ძირითად პროდუქტს აწარმოებს, მათ შორის ფეროსილიკომანგანუმს, ფერომანგანუმს და ფეროსილიციუმს. 2021 წელს კომპანიის წარმოებამ 31,134 ტონას მიაღწია.

„კომპანიის სამომავლო განვითარების გეგმა და მისი განხორციელებისთვის საჭირო დამატებითი კაპიტალის მოზიდვის მეთოდები, წარმოების ზრდის კუთხით უცვლელია. ისევე როგორც ისტორიულად, მომავალშიც განსაზღვრულია ეტაპობრივად სიმძლავრეების ზრდა, დამატებითი მნიშვნელოვანი ფინანსური სახსრების მოზიდვის გარეშე, კომპანიის საქმიანობის შედეგად მიღებული ფინანსური სახსრების გამოყენებით.

2019 წელს დასრულდა მშენებლობა და ექსპლოატაციაში შევიდა ახალი თანამედროვე აგლომერაციის ქარხანა. ნედლეულის წარმოების განვითარების კუთხით მნიშვნელოვანი დადებითი შედეგი აქვს აგლომერაციის ქარხანას, რადგან აღნიშნული ქარხნის მეშვეობით ხდება საქართველოში არსებული მანგანუმის მადნის წარმოების ნარჩენების გადამუშავება და მისგან ფეროშენადნობების საწარმოებლად საჭირო ნედლეულის მიღება. აგლომერაციის ქარხანა, მანგანუმის კონცენტრატის გამამდიდრებელ ქარხნებთან ერთად, საშუალებას იძლევა გარკვეულწილად გადაიჭრას საქართველოში არსებული ნედლეულის დეფიციტის პრობლემა. ამასთან აღსანიშნავია ის გარემოებაც, რომ ანალოგიური ტიპის წარმოება ამიერკავკასიის მასშტაბით არ არსებობს.

მანგანუმის ფეროშენადნობების უმეტესი ნაწილი ექსპორტზე ძირითადად ევროკავშირში, აშშ-ში, თურქეთსა და დსთ-ში გადის.

სამომავლო განვითარების მიზნით, 2022 წელს კომპანია გეგმავს ფეროშენადნობების წარმოების სიმძლავრეების გაზრდას ორი ახალი ღუმელის დამატებით. აღნიშნული პროექტის ექსპლოატაციაში შესვლის შემდეგ, წარმოების მოცულობა გაიზრდება 1200 ტონით თვეში. წარმოების სიმძლავრეების გაზრდის პარალელურად 2022 წელს კომპანია ასევე გეგმავს ახალი ელექტრო გადამცემი ხაზის მშენებლობას და არსებული ელექტროქსვესადგურის რეაბილიტაციას,” - ნათქვამია კომპანიის ანგარიშში.

შპს „ჭიათურმანგანუმ ჯორჯია” 2008 წელს დაფუძნდა. 2021 წლის 31 დეკემბრის მდგომარეობით, ჯგუფის პარტნიორს წარმოადგენდა წილის 100%-ის მფლობელი Greenfield Financial Corp (“მშობელი კომპანია), რეგისტრირებული სეიშელის რესპუბლიკაში. 2020 წლის 31 დეკემბრის მონაცემებით ჯგუფს ჰყავდა კიდევ ერთი პარტნიორი, წილის 5%-ის მფლობელი, ჰორსტ კოსტა იჰია. 2021 წელს მშობელმა კომპანიამ შეიძინა კომპანიის 5% და გახდა კომპანიის ერთადერთი მფლობელი. იმავე პერიოდის განმავლობაში მშობელი კომპანიის საბოლოო მფლობელი იყო ფიზიკური პირი - შმაგი ქემერტელიძე (100%).