„2012 წლამდე ჯანდაცვა პრივილეგია იყო, მას შემდეგ კი პრიორიტეტი გახდა“, – ამის შესახებ საქართველოს პარლამენტის სამშაბათის პლენარულ სხდომაზე ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძემ განაცხადა. მისი თქმით, ქართული ოცნების ხელისუფლებაში მოსვლის შემდეგ ჯანდაცვაზე ხელმისაწვდომობა მნიშვნელოვნად გაიზარდა. ქართული ოცნების გუნდის წევრმა სიტყვით გამოსვლაში ყურადღება ქვეყანაში შექმნილ რთულ ეკონომიკურ მდგომარეობაზეც გაამახვილა და აღნიშნა, რომ სიღარიბე ერთიანი ნაციონალური მოძრაობის მმართველობის პერიოდთან შედარებით 50%-ით არის შემცირებული.

მიიღე ინფორმაცია უფრო სწრაფად „კომერსანტის“ Telegram-ზე.

„საყოველთაო ჯანდაცვის სისტემით 2 მლნ ადამიანმა 4 მილიონჯერ ისარგებლა ამ სერვისით. მანამდე მოქალაქეები სახლ-კარს ყიდდნენ და ამით ღარიბდებოდნენ. რაც შეეხება სიღარიბეს, პარტიული ტელევიზიებიდან ყოველდღიურად გვემის, რომ ქვეყანაში 140 000 ბავშვი შიმშილობს და ეს ბავშვები შიმშილით იღუპებიან. ასევე ის, რომ ყოველი მე-5 ადამიანი ღატაკია და ასეთი სურათი ქართულმა ოცნებამ შექმნა. ამაზე საპასუხოდ მოვიყვან მსოფლიო ბანკის უკანასკნელი კვლევის შედეგებს, რომლის მიხედვითაც 2012 წელთან შედარებით უკიდურესი სიღარიბე დღეს ქვეყანაში არის 50%-ით შემცირებული, ანუ განახევრებული, თუმცა ესეც ბევრია და უფრო მეტია ამ კუთხით გასაკეთებელი. ბავშვთა სიკვდილიანობაზე მინდა ვთქვა: 2009 წელს ჩვენს ქვეყანაში ყველაზე მეტი ბავშვის გარდაცვალება დაფიქსირდა. ჩვენ ოპონენტებს რომ ჰკითხო, ყველაზე მეტი ადამიანი ქვეყანას ქართული ოცნების ხელისუფლების მმართველობის პერიოდში ტოვებს. სრული პასუხისმგებლობის მინდა გითხრათ – ქვეყანა ყველაზე მეტმა ადამიანმა 2009-10-11 წლებში დატოვა, ეს მოქალაქეები უკან არ დაბრუნებულან“, - განაცხადა დიმიტრი ხუნდაძემ.