6 აპრილს საქართველოში კოვიდით არავინ გარდაცვლილა რაც 2020 წლის 20 სექტემბრის შემდეგ პირველი შემთხვევაა. პიკის დროს 2021 წლის აგვისტო-სექტემბერსა და ნოემბერში დღიურმა სიკვდილიანობამ რამდენჯერმე 80-საც გადააჭარბა. სულ კი ინფიცირების პირველი დადასტურებული შემთხვევიდან დღემდე ვირუსს საქართველოში 16 765 ადამიანი ემსხვერპლა.
მიიღე ინფორმაცია უფრო სწრაფად „კომერსანტის“ Telegram-ზე.
საქართველოში კოვიდის პირველი შემთხვევა 2020 წლის 26 თებერვალს გამოვლინდა, პირველი პაციენტი 4 აპრილის გარდაიცვალა. ძალიან მკაცრი ლოკდაუნის შედეგად პანდემიის დაწყებიდან 6 თვის შემდეგ ქვეყანაში სულ ინფიცირების 1500-მდე და გარდაცვალების 19 შემთხვევა ფიქსირდებოდა. მდგომარეობა სექტემბრიდან გაუარესდა, 2021 კი უფრო მძიმე აღმოჩნდა, რა დროსაც ჯამური სიკვდილიანობა 2020 წელთან შედარებით 18.5%-ით 59 906-მდე გაიზარდა, რომლის უმთავრესი მიზეზიც კოვიდი გახდა. მძიმე ეპიდემიოლოგიურ სიტუაციას მძლავრი ანტივაქსერული განწყობებიც დაემატა, რისი განეიტრალებაც მთავრობამ ვერ შეძლო.
2020 წელს 2 მკაცრი ლოქდაუნის შემდეგ ეკონომიკა 6.2%-ით შემცირდა, ასეთი დიდი ვარდნა 1994 წლის შემდეგ აღარ მომხდარა, მაგრამ ლოქდაუნებმა ვირუსი მხოლოდ დროებით შეაჩერა. მოსახლეობის რაოდენობის გათვალისწინებით ქვეყანა კოვიდით სიკვდილიანობით დღემდე მეშვიდე ადგილს ინარჩუნებს.