უძრავი ქონების ბაზარი „კოვიდ-19“-მა ვერ შეაფერხა. სამშენებლო კომპანია ,,არსის“ აღმასრულებელი დირექტორის ბესო ორთოიძის ინფორმაციით, 2021 წლის გეგმა 10%-იანი გადაჭარბებით შესრულდა, ხოლო ბინების რეალიზაცია პანდემიამდელი 2019 წლის მაჩვენებელს გაუთანაბრდა. მისივე შეფასებით, სტაბილურობაა თითქმის ყველა კომპანიაში, რაც მოწმობს, რომ უძრავი ქონების ბაზარმა ერთ-ერთმა პირველმა შეძლო კრიზისის დაძლევა და განვითარებას აგრძელებს.
,,2020 წელს სექტორმა დიდი ვარდნა განიცადა. ვფიქრობდით, რომ პანდემია მკვეთრ ნეგატიურ გავლენას მოახდენდა უძრავი ქონების ბაზარზე და ჩვენს კომპანიაზეც, მაგრამ ტენდენცია სასიკეთოდ შეიცვალა. მიუხედავად იმისა, რომ შარშან მთავრობამ იპოთეკური სესხების სუბსიდირების პროგრამა ვერ გააგრძელა, ამას სექტორში პრობლემა არ გამოუწვევია და მოთხოვნა სტაბილური გახდა. თვითონ ბაზარიც სტაბილური და მზარდი იყო 2021 წლის მეორე ნახევარში, ხოლო უკვე მესამე კვარტლისთვის გაუტოლდა 2019 წლის მონაცემებს და ასე დაიხურა წელიც. ერთ-ერთი პირველი სექტორი, რომელიც ქართულ ეკონომიკაში აღდგა, უძრავი ქონების ბაზარი აღმოჩნდა. დასახული გეგმა 10%-იანი გადაჭარბებით შესრულდა, რასაც არავინ ველოდით. გამოწვევას არ შევუშინდით და პანდემიის პერიოდში, 2020 წელს დავიწყეთ ახალი პროექტი ,,შენი სახლი სამგორში“, რომელიც გრძელდება. 2021 წელს 3 სახლის მშენებლობა დავასრულეთ. ასევე დავიწყეთ ახალი პროექტი ,,შენი სახლი ლისზე“, რომლის ფარგლებშიც იანვრიდან უკვე აქტიური სამუშაოები დაიწყება“, - ამბობს ,,კომერსანტთან“ ბესო ორთოიძე.
ქართულ ბაზარზე ერთ-ერთი წამყვანი სამშენებლო კომპანიის აღმასრულებელი დირექტორი ფიქრობს, რომ გაწეული ძალისხმევა შეუმჩნეველი არ დარჩა მომხმარებელს, რომელმაც უფრო თამამად მიიღო გადაწყვეტილება და ნდობით განეწყო, რასაც გაყიდვების ზრდა ადასტურებს.
,,სამშენებლო კომპანიებმა, მათ შორის ,,არსმა“, იგრძნეს სტაბილურობა და არ გაჩერდნენ პანდემიის მიუხედავად, რაც დიდწილად მოხერხდა. ამას ხედავს მომხმარებელიც. კომპანია, რომელიც გამოწვევებს არ უშინდება და აგრძელებს პროექტებს, მეტ ნდობას იწვევს მოსახლეობაშიც და გადაწყვეტილებებს უფრო თამამად იღებენ. ჩვენს შემთხვევაშიც ასე მოხდა. ინვესტიციების თვალსაზრისით, უძრავი ქონების ბაზარი გახდა ყველაზე საიმედო დარგი. ფულის დაბანდების სხვა საშუალებები შექმნილ ვითარებაში მეტნაკლებად სარისკოა. ფასიან ქაღალდებსა და კრიპტოვალუტაში ინვესტირებას გარკვეული საფრთხე ახლავს, რადგან ასეთ ბაზრებს კრიზისისას მკვეთრი ვარდნა ახასიათებს. რისკი გავწიეთ და შედეგიც სახეზეა, დღესდღეობით უძრავი ქონების ბაზარი ერთ-ერთი ყველაზე მყარი სეგმენტია საქართველოს ეკონომიკაში. იშვიათად არის შემთხვევა, რომ უშუალოდ „კოვიდ19“-ის გამო რომელიმე კომპანია გაჩერებულიყო“, - დასძენს ბესო ორთოიძე ,,კომერსანტთან“ საუბარში.
რაც შეეხება ფასებს, მისივე თქმით, 2021 წელს ბინების ღირებულება 10%-ით გაიზარდა, ხოლო თვითღირებულება 30-35%-იანი ზრდა განიცადა, რაც, სავარაუდოდ, ფასებძე მომავალშიც მოახდენს გავლენას. ორთოიძის ინფორმაციით, მოსალოდნელია, რომ უძრავი ქონების ღირებულება ეტაპობრივად გაძვირდეს.
ცნობისთვის, მშენებლობის ღირებულების ინდექსი 2021 წლის მესამე კვარტალში, წინა კვარტალთან შედარებით, 1.8 პროცენტით გაიზარდა. სტატისტიკის ეროვნული სამსახურის ცნობით, აღნიშნული ცვლილება, ძირითადად, განპირობებული იყო სამშენებლო მასალებზე ფასების 2.7 პროცენტიანი მატებით, რამაც 1.59 პროცენტული პუნქტი შეიტანა ჯამური ინდექსის ცვლილებაში.
წინა წლის შესაბამის კვარტალთან შედარებით მშენებლობის ღირებულების ინდექსი გაიზარდა 14.1 პროცენტით. ინდექსის ზრდა, ძირითადად, გამოწვეული იყო სამშენებლო მასალებზე ფასების 19.6 პროცენტიანი ზრდით, რაც 11.07 პროცენტული პუნქტით აისახა მთლიანი ინდექსის ცვლილებაზე.
მარი ჩიტაია