საავტომობილო ბიზნესისთვის 2021 წელი მრავალმხრივ საინტერესო აღმოჩნდა. გარდა იმისა, რომ მანქანები გაძვირდა, წამყვანი ქართული ავტო კომპანიების გაყიდვები გააქტიურდა და გლობალურ ბაზრებზეც პოზიციები გაიუმჯობესეს. ,,კავკასიის ავტოიმპორტი“,  საქართველოში ავტომობილების ლიდერი კომპანიის გაყიდვების მაჩვენებელმა და თანამშრომელთა რაოდენობამ წელს საგრძნობლად მოიმატა. კომპანიის გენერალური დირექტორის გიორგი სურგულაძის ინფორმაციით, 2022 წლის დასაწყისში დედაქალაქში მსხვილი ფილიალის გახსნას და დამატებით რამდენიმე ქვეყნის ბაზარზე შესვლას გეგმავს.

,,პანდემიის მიუხედავად, საავტომობილო ბიზნესი საგრძნობლად გაფართოვდა. გაზრდილია ყველა მიმართულება, რეექსპორტი 60%-ზეა მთლიან მოცულობაში. ჩვენი კომპანიის მაგალითი ამ მხრივ ერთ-ერთი საუკეთესოა. ავითვისეთ ახალი ბაზრები, როგორიცაა ყაზახეთი, ყირგიზეთი, ტაჯიკეთი, უზბეკეთი და სხვა. პრაქტიკულად ყველა ქვეყანაში გადის მანქანები, სომხეთიც გამოცოცხლდა. გამოძებნეს შესაძლებლობა, რომ საბაჟო კავშირის ქვეყნებში შეიტანონ მანქანები სომხეთიდან და ამან დიდი აქტიურობა გამოიწვია. თვითონ ქვეყნებმაც შეცვალეს წესები. მაგალითად, როცა იურიუდიულ პირზე შედის ავტომობილი, განბაჟება ხდება იაფად, ხოლო 1 წლის შემდეგ მას შეუძლია კერძო პირზე გაყიდვა. ამან ავტო ბიზნესი წაახალისა“, - ამბობს სურგულაძე ,,კომერსანტთან“.

რაც შეეხება ადგილობრივ ბაზარს, მისი ინფორმაციით, დეფიციტი შეიმჩნევა, ვინაიდან მოთხოვნა მეტია, ვიდრე მიწოდება.

სულ რამდენიმე თვის წინ ,,კავკასიის ავტოიმპორტმა“ ფილიალი გახსნა აფრიკაში, უახლოეს პერიოდში კი 2 ახალ ბაზარზე აპირებს შესვლას, თუმცა ქვეყნებს გიორგი სურგულაძე ჯერჯერობით არ აკონკრეტებს.

,,გლობალურ ბაზრებსა და საქართველოშიც მანქანებზე დიდი მოთხოვნაა. თუმცა სიძნელეებია ტრანსპორტირების პროცესში, ამერიკულ პორტებთან დაკავშირებითაც ვერ დაწყნარდა სიტუაცია, რაც საბოლოო ჯამში მანქანებს აძვირებს, დაახლოებით 20%-ით არის ფასები გაზრდილი, ანალოგიურად საქართველოშიც. შედეგს ვაჯამებთ, ზუსტი მონაცემები წლის ბოლოს გვექნება მზად, როცა უკვე ოფიციალური მონაცემებიც გამოქვეყნდება. წინ ბევრი სიახლე გველის, ვგეგმავთ განვითარებას, 2 ახალ ბაზარზე შევალთ 2022 წელს, ხოლო თბილისში, ბელიაშვილის ქუჩაზე დიდ ოფისს ვხსნით, სადაც 50-მდე ადამიანი დასაქმდება“, - აცხადებს სურგულაძე ,,კომერსანტთან“.

ამ დროისთვის ,,კავკასიის ავტოიმპორტში“ 280 ადამიანია დასაქმებული. მათ შორის 70 უკრაინაში, 12 - აფრიკაში. როგორც კომპანიის დირექტორი აღნიშნავს, ეს არიან მაღალანაზღაურებადი კადრები, რომელთა შრომის ანაზღაურება გაცილებით მაღალია, ვიდრე ოფიციალური საშუალო ხელფასია საქართველოში.

ცნობისთვის, ,,კავკასიის ავტოიმპორტი“ ყველაზე მსხვილი ავტო იმპორტიორი კომპანია და უპირობო ლიდერია კავკასიის რეგიონში. 17–წლიანი წარმატებული ისტორიის განმავლობაში კომპანიამ მოახდინა 200 000-ზე მეტი ავტომობილის იმპორტი და რეალიზაცია, ჩამოაყალიბა ფილიალების ფართო ქსელი (43 ფილიალი) საქართველოსა და მსოფლიოს სხვადასხვა ქვეყანაში.

მარი ჩიტაია