კომერციულ ფართებზე 2021 წელს მოთხოვნა გაიზარდა, თუმცა მიწოდების მხრივ დიდი პრობლემაა. როგორც აღმოჩნდა, კორონავირუსის პანდემიის დაწყების შემდეგ კომერციული ფართების გაქირავების სერვისი სერიოზულ პრობლემას განიცდის. მიუხედავად იმისა, რომ მაღალი მოთხოვნაა, ფართების სიმცირე აშკარად შეიმჩნევა. ამის მიზეზად უძრავი ქონების სააგენტოებში მშენებლობის დაბალ ტემპს მიიჩნევენ. როგორც კომპანია ,,კიბეს“ დამფუძნებელი ნელი გოგუაძე ,,კომერსანტთან“ ამბობს, კომერციული ფართების ძირითად დამქირავებლები ბაზარზე ქსელური სუპერმარკეტები არიან, რომელთა მხრიდან განსაკუთრებით დედაქალაქის ცენტრალურ უბნებზე არის მოთხოვნა გაზრდილი.
,,კომერციულ ფართებზე ბოლო წლების განმავლობაში, განსაკუთრებით კი 2021 წელს დიდი მოთხოვნა გაჩნდა. ძირითადად აქტიურობენ ქსელური მარკეტები, რომლებსაც სურთ ფართების დაქირავება, მაგრამ ასეთი ობიექტები უკვე ნაკლებადაა, ეს ნიშნავს, რომ მიწოდების მხრივ დიდი პრობლემაა. ანალოგიური ვითარებაა საოფისე ფართებზეც. როგორც წესი, სუპერმარკეტები ძირითადად 10-15 წლიან კონტრაქტებს აფორმებენ, მაგრამ ბოლო დროს ხელშეკრულებები ნაკლებად იდება, რადგან ფართების სიმცირეა. ახალი სამშენებლო პროექტები თუ არ განხორციელდება, კარგი კომერციული ფართები უკვე ნაკლებადაა და მალე შეიძლება დეფიციტიც შეიქმნას. პრობლემა ძირითადად ცენტრალურ უბნებშია, ამიტომ როგორც კი ახალი კორპუსი შენდება, პირველი სართულები დიდხანს არ რჩება გასაქირავებელი“, - ამბობს ნელი გოგუაძე ,,კომერსანტთან“.
მისი თქმით, გაურკვეველი ეპიდემიოლოგიური მომავალი გაქირავების ბაზარზეც ახდენს უარყოფით გავლენას.
,,კომერციული ფართების ბაზარზე ძირითადი მოთამაშეები არიან სუპერმარკეტები, მეორე ადგილს აფთიაქები იკავებენ, რომლებიც ქირაობენ ფართებს და მათ კოვიდრეგულაციები ნაკლებად ეხებათ. კვების ობიექტები კი ამ მხრივ მეტად რთულ ვითარებაში არიან. ისინი ხშირად ექცევიან სხვადასხვაგვარი კოვიდრეგულაციების ქვეშ. შესაბამისად, კომერციულ ფართებზე მოთხოვნა მათი მხრიდან შემცირდა, თუმცა არა მასობრივად, რადგან ვითარება ასე თუ ისე დასტაბილურდა”, - ამბობს ნელი გოგუაძე.
ცნობისთვის, ,,თიბისი კაპიტალის“ მიერ გავრცელებული ინფორმაციის მიხედვით, ქირისა და გასაყიდი ფასის ფარდობა 2020 წლის მარტიდან კლდებითი ტენდენციით ხასიათდებოდა, მაგრამ ბოლო პერიოდში შედარებით სტაბილურია და 2021 წლის ოქტომბერში 7%-ს უტოლდება. ეს მაჩვენებელი გრძელვადიან საშუალოზე 1.3%-ით ნაკლებია.
დოკუმენტში ასევე აღნიშნულია, რომ ბათუმზე პანდემიამ უფრო მეტად იმოქმედა, მაგრამ 2022 წლიდან, ტრანზაქციების რაოდენობა და ფასი, ბათუმში უფრო სწრაფად აღდგება თბილისთან შედარებით.
ამასთან, 2021 წლის მესამე კვარტალში საშუალო შეწონილი იჯარა 13%-ით ჩამოუვარდებოდა 2019 წლის იმავე მაჩვენებელს სტრიტ რითეილში, ხოლო სავაჭრო ცენტრებში 19%-ით.
მარი ჩიტაია