2021 წელს მთავრობამ აუქციონი 7 ეტაპად ჩაატარა. გაყიდული 269 ლოტის საწყისი ფასი 147 მლნ ლარი იყო, მიღებულმა შემოსავალმა კი 297 მლნ-ს გადააჭარბა. წინა პერიოდების მსგავსად, განსაკუთრებულად მსხვილი გარიგება არც წელს დაფიქსირებულა.
პირველი ეტაპის აუქციონზე ყველაზე ძვირად - 5.251 მლნ ლარად მცხეთაში მუხათწყაროს მიმდებარე ტერიტორიაზე მდებარე 63 ათასი კვადრატული მეტრი მიწის ნაკვეთი გაიყიდა. საწყისი ფასი 3.166 მლნ-ს შეადგენდა, ბიჯი 417 ლარს. გამარჯვებული შპს ლიდერმშენი 2020 გახდა.
მეორე ეტაპზე ბათუმში ფიროსმანის ქუჩა N12ა-ში არსებული 7023 კვ.მ არასასოფლო-სამეურნეო დანიშნულების მიწის ნაკვეთი 30 მლნ ლარად გაიყიდა, საწყისი ფასი 11.4 მლნ იყო, ბიჯი 3723 ლარს შეადგენდა. აუქციონში გამარჯვებული სს დე ჯგუფი გახდა. ასევე მეორე ეტაპზე 11-11 მლნ ლარად გაიყიდა მცხეთაში მდებარე 2 მიწის ნაკვეთიც. სულ კი ჯამში მეორე ეტაპზე აუქციონებიდან სახელმწიფომ 73 მლნ ლარის შემოსავალი მიიღო.
მესამე ეტაპზე მცხეთაში, სოფელ მუხრანში მდებარე მიწის ნაკვეთი შპს ქანდა აგრიქალჩერმა 11 მლნ ლარად შეიძინა, მეოთხე ეტაპზე ყველაზე ძვირად - 3.4 მლნ ლარად რუსთავში მდებარე მიწის ნაკვეთი გაიყიდა, ახალი მფლობელი შპს მორენ თაუნის გახდა.
მეხუთე ეტაპზე ბათუმში, ზ. გორგილაძის ქუჩის ბოლოს პოლიტექნიკური ინსტიტუტის მიმდებარედ არსებული 2298 კვ.მ. არასასოფლო-სამეურნეო დანიშნულების მიწის ნაკვეთი 3.6 მლნ-დ შეფასდა და 19 მლნ-დ გაიყიდა. მფლობელი შპს რეალ პალასი გახდა.
მეექვსე ეტაპზე ყველაზე ძვირად - 3.2 მლნ-დ თბილისში კახეთის გზატკეცილზე მდებარე მიწის ნაკვეთი გაიყიდა, ხოლო მეშვიდეზე ასევე თბილისში მდებარე მიწის ნაკვეთი, რომლის ფასიც ვაჭრობის შედეგად მხოლოდ 10 ათასი ლარი გაიზარდა და საბოლოოდ შპს ტიბინი დეველოპმენდს 4.719 მლნ-ის გადახდა მოუწია.
საქართველოს რკინიგზა, თბილისის მეტრო, რუსეთ-სომხეთის დამაკავშირებელი გაზსადენი, ავტობანი, გაერთიანებული წყალმომარაგების კომპანია, სასოფლო-სამეურნეო დანიშნულების მიწის თითქმის ნახევარი, ტყეების 100%, წიაღისეული, ავტობანი დღემდე სახელმწიფოს საკუთრებაში რჩება. პრივატიზაციაზე უარის თქმის მიზეზად ძირითადად „სტრატეგიული დანიშნულება“ სახელდება, რასაც სოციალური ფონიც ემატება. მეტრო 1 ლარადაც რომ გაყიდონ ახალ მფლობელს მგზავრობის ტარიფის გაზრდა მოუწევს, რამდენია მგზავრობის თვითღირებულება ამაზე პასუხი თავად სატრანსპორტო კომპანიაშიც არ გააჩნიათ. 2017 წელს საკონსტიტუციო ცვლილებების შედეგად უცხო ქვეყნის მოქალაქეს სასოფლო-სამეურნეო დანიშნულების მიწის შეძენა აეკრძალა, რამაც პრივატიზაციის პროცესი კიდევ უფრო შეანელა.
გიორგი ელიზბარაშვილი