2021 წელს შპს „თოკას ბიოლოგიური მეურნეობა“ ველური სატაცურის გაყიდვების განახლებას და ასევე სატაცურის სხვადასხვა სახეობების მოყვანის დაწყებას გეგმავს.
კომპანიის ფერმა, რომელიც პროდუქციას ბრენდ „მწვანე რესპუბლიკას“ ქვეშ აწარმოებს, ასპინძის მუნიციპალიტეტში მდებარეობს. სადღეისოდ კომპანია 20 ჰექტარ მიწას ფლობს, რომელზეც დარგულია სხვადასხვა კენკროვანები, ხილი და ბოსტნეული.
„თოკას ბიოლოგიური მეურნეობის“ დირექტორის და დამფუძნებლის თორნიკე მჟავანაძის თქმით, ველური სატაცური „მწვანე რესპუბლიკა“ საქართველოს სავაჭრო ქსელში 2019 წელსგამოჩნდა. მისი თქმით, ესაა ენდემური ქართული ჯიში, რომელიც მაღალმთიან, ეკოლოგიურად სუფთა ზონაში მოდის.
„ილიაუნთან ერთად, ჩვენ სამცხე-ჯავახეთში სატაცურის ენდემურ ჯიშებთან დაკავშირებით სერიოზული კვლევა ჩავატარეთ და ველური მცენარის კრეფა მაღალმთიან რეგიონში გადავწყვიტეთ. გარეგნულად ის ჩვეულებრივი სატაცურისგან არაფრით განსხვავდება, მაგრამ ბევრად უფრო გემრიელი და არომატულია. თანაც, ორგანული პროდუქტი უფრო ძვირია. 2019 წელს ჩვენ მივიღეთ საერთაშორისო ბიო სერტიფიკატი DakkS, რის შემდეგაც პროდუქტის გაყიდვა ადგილობრივ ბაზარზე დავიწყეთ“, - განაცხადა მჟავანაძემ.
მისი თქმით, 2020 წლის მარტში პანდემიის პირობებში, კომპანიამ წარმოება შეაჩერა, ხოლო 2021-ში განახლებას გეგმავს. პირველ ეტაპზე გაყიდვები მხოლოდ ადგილობრივ ბაზარზე იგეგმება, ექსპორტზე ფიქრი კომპანიის ხელმძღვანელობას ნაადრევად მიაჩნია.
„2019 წელს ჩვენ საცდელი პარტია ევროკავშირში გავაგზავნეთ, და ძალიან კარგი შეფასებები მივიღეთ. მაგრამ მუდმივ და სტაბილურ ექსპორტზე გასვლას ვერ ვახერხებთ, რადგანაც ველური სატაცურის მოსავალი მნიშვნელოვნად დამოკიდებულია კლიმატურ პირობებზე, შესაბამისად, ამ ეტაპზე ჩვენ უწყვეტი ექსპორტის უზრუნველყოფა არ შეგვიძლია. ამიტომაც საერთაშორისო ბაზრებზე ჩვენ მხოლოდ საკუთარი წარმოების აწყობის შემდეგ გავალთ“ - ამბობს თორნიკე მჟავანაძე.
„2021 წელს ველური სატაცურის კრეფასთან ერთად, ჩვენ რამდენიმე სახეობის კულტივირებას ჩვენსავე ფერმაში ვაპირებთ. ეს იქნება როგორც კარგად ცნობილი და ევროპაში პოპულარული, ასევე ენდემური, ველური ჯიშები. გვინდა ვნახოთ, რომელი იქნება უფრო მოსავლიანი კონკრეტული ნიადაგის და კლიმატის პირობებში. ეს ერთგვარი ექსპერიმენტი იქნება და ჩვენ ამისთვის ინტენსიურად ვემზადებით“ - განაცხადა კომპანიის დირექტორმა.
მისი თქმით, სატაცურს სტაბილური წარმოება „მწვანე რესპუბლიკას“ ექსპორტზე გასვლის და სტაბილური მიწოდების უზრუნველყოფის შესაძლებლობას მისცემს.
„თუ ყველაფერი კარგად ჩაივლის, სავარაუდოდ 2024 წლიდან ექსპორტსაც დავიწყებთ. უფრო ადრე არ გამოვა, რადგანაც სატაცური მოსავალს მხოლოდ მესამე წელს იძლევა. რა თქმა უნდა, ჩვენთვის ყველაზე პერსპექტიული ბაზარი ევროკავშირია, სადაც სატაცურზე ძალიან დიდი მოთხოვნაა, თანაც ჩვენ ამ ბაზარზე მუშაობის გამოცდილება უკვე გვაქვს“ - ამბობს თორნიკე მჟავანაძე.
east-fruit.com
თენგიზ აბლოთია