საქართველოში რძის პროდუქტების მსხვილმა მწარმოებელმა კომპანიამ „სანტემ” 2021 წელი 4.1 მილიონი ლარის წმინდა მოგებით დაასრულა, რაც 2020 წლის მონაცემებს თითქმის 1 მლნ ლარით ჩამორჩება, ორი წლის წინ მისი მოგება 5.5 მლნ ლარი იყო.
თუმცა შპს სანტე ჯი ემ თი პროდუქტები სრული შემოსავლები გასულ წელს 3.6 მილიონი ლარი იყო.
ქართული კომპანია Sante GMT ქართულ ბაზარზე 1997 წლიდან არის წარმოდგენილი და დღეისათვის 125-მდე დასახელების პროდუქტს აწარმოებს. 2016 წელს ფრანგული კომპანია „ლაქტალისი“ კომპანია „სანტეს“ აქციების საკონტროლო პაკეტის მფლობელი გახდა. კომპანიას ეკუთვნის ოთხი ბრენდი, მათ შორის Santisimo.
2020 წელს ბიუჯეტში „ლაქტალიტ ჯორჯიას“ გადახდილი თანხა შეადგენს - 6 103 506 ლარს და 2021 წელს — 8 441 553 ლარს. გლობალური ბრენდი „ლაქტალისის” საბოლოო ბენეფიციარები ბენსიერების ოჯახია, რომელთა აქტივებიც 25 მილიარდ დოლარს აჭარბებს.
„კომპანიაზე ნეგატიური ეფექტი იქონია ჰორეკას მიმართულებით გაყიდვების ვარდნამ, ვინაიდან ჰორეკა შეადგენს გაყიდვების 25-30%, 2020 წლის მარტი-ივლისის პერიოდში შეიმჩნევა გაყიდვების 70% -ით ვარდნა, 2021 წლიდან მდგომარეობა შედარებით გაუმჯობესდა. COVID19-მა ასევე უარყოფითი ეფექტი იქონია 2020 წლის ტურისტულ სეზონზე, თუმცა 2021 წელს მიუახლოვდა პანდემიამდელ პერიოდს. კიდევ ერთი მნიშვნელოვანი გამოწვევა რის წინაშეც დგას კომპანია არის დებიტორული დავალიანებების ზრდა, რაც დაკავშირებულია ჰორეკას ქსელთან, როდესაც სასტუმროებს და სხვადასხვა კვების ობიექტებს შეუჩერდათ მუშაობა და შეექმნათ ფინანსური პრობლემები, შედეგად გაუარესდა მათი გადამხდელუნარიანობა.
მდგომარეობა შედარებით გაუმჯობესდა 2021 წლის მეორე ნახევარში, თუმცა ჯერ სრულად ვერ მიუახლოვდა 2019 წლის მაჩვენებელს. ეროვნული ვალუტის გაუფასურებამ არსებითი ზიანი მიაყენა კომპანიას, პროდუქციის უდიდესი ნაწილი არის იმპორტირებული შესაბამისად ანგარიშწორება ხდება უცხოურ ვალუტაში.
კომპანიის ერთ-ერთი მთავარი გამოწვევა უახლოეს მომავალში არის განავითაროს ყველის ბაზარი საქართველოში და ამას გარდა ქვეყნის ფარგლებს გარეთ გაიტანოს ქართული სახელი და ტრადიციები ისეთი პროდუქტების სახით მაგალითად როგორიცაა - ქართული ყველი ან თუნდაც ენდემური მაწონი,”- ნათქვამია კომპანიის ანგარიშში.
ფინანსური ანგარიშის მიხედვით, კომპანიის აქტივები 118 მილიონი ლარია, ხოლო კომპანიის ვალდებულებები 23.9 მილიონი ლარია. კომპანიისთვის მთავარი ხარჯი რეალიზებული საქონლის თვითღირებულებაა, რამაც გასულ წელს 69 მილიონი ლარი შეადგინა. ამასთან, საქონლის მიწოდების ხარჯები რაც ხელფასებს, მარკეტინგს და სხვა ხარჯებს მოიცავს 30 მილიონ ლარს შეადგენდა.
სანტე
