ჯანმრთელობის დაცვისა და სოციალურ საკითხთა კომიტეტის სხდომაზე, სსიპ საპენსიო სააგენტოს 2021 წლის ანგარიში განიხილეს.
საპენსიო სააგენტოს დირექტორის, გიორგი დანელიას ინფორმაციით, ანგარიში წარმოადგენს ინფორმაციას 2021 წლის განმავლობაში საპენსიო სააგენტოს მიერ გაწეული საქმიანობის და განხორციელებული ღონისძიებების შესახებ, ასევე, დაგროვებითი საპენსიო სქემისათვის მნიშვნელოვან ძირითად სტატისტიკურ მონაცემებს.
მომხსენებელმა დაგროვებით საპენსიო სქემაში გაწევრიანების სტატისტიკაზე ისაუბრა. მისი თქმით, 2021 წლის 31 დეკემბრის მდგომარეობით, საპენსიო სქემაში გაწევრიანებულია 1,235,962, დასაქმებული, დამსაქმებლების ოდენობის მაჩვენებელი კი 82,795-ია.
„საპენსიო ფონდში შეტანილი თანხის საერთო ოდენობამ შეადგინა 1,782,134,866.25 ლარი. ამავე პერიოდში ფონდიდან გამოტანილი იქნა 66,483,394.86 ლარი“, - აღნიშნა სააგენტოს ხელმძღვანელმა.
მომხსენებელმა ელექტრონულ სისტემაში განხორციელებულ ცვლილებებზე ისაუბრა, რის შედეგად მომხმარებლებს უკვე აქვთ საშუალება სერვისები ელექტრონულად, დისტანციურად მიიღონ. მისი თქმით, სააგენტოს ნომინალური მფლობელობის ანგარიშები საქართველოს 10 კომერციულ ბანკში ჰქონდა გახსნილი, რომელთა მეშვეობით სააგენტო საპენსიო შენატანების შეგროვებას ახდენდა.
„საანგარიშო პერიოდში დარიცხული ნომინალური საპროცენტო განაკვეთი შეადგენდა 8 %-დან - 9.6%-მდე და აღნიშნულ პერიოდში დარიცხული საპროცენტო სარგებლის ოდენობამ 18,243,117.18 ლარი შეადგინა“, - განაცხადა გიორგი დანელიამ. მომხსენებელმა დაგროვებითი საპენსიო სქემიდან გასვლის პროცესზე ისაუბრა.
გიორგი დანელიას ინფორმაციით, საანგარიშო პერიოდში გაცემული პენსიისა და საპენსიო აქტივების ჯამურმა ოდენობამ 2,184,460.79 ლარი, ხოლო 2021 წლის განმავლობაში გაცემულმა პენსიამ 1,559,077.35 ლარი შეადგინა.
მომხსენებელმა საინვესტიციო საბჭოსა და საინვესტიციო სამსახურის საქმიანობაზეც ისაუბრა. მისი ინფორმაციით, საანგარიშო პერიოდში, საინვესტიციო აქტივების მოცულობა შეადგენდა 1,980,289,982 ლარს.
დანელიამ ყურადღება გაამახვილა საპენსიო სააგენტოსა და დაგროვებითი საპენსიო ფონდის ფინანსური ანგარიშგებების დამოუკიდებელ აუდიტორულ შემოწმების პროცესზე. როგორც გიორგი დანელიამ აღნიშნა, 2021 წლის დამტკიცებული ბიუჯეტი შეადგენდა 6 მლნ ლარს, საიდანაც 57% დაფინანსებული იქნა სახელმწიფო ბიუჯეტიდან, ხოლო 43% საპენსიო აქტივების წლიური მომსახურების საფასურით. მისი თქმით, საანგარიშო პერიოდის ბიუჯეტის შესრულების მაჩვენებელი შეადგენს 99%-ს, რომლის 13% მიმართული იქნა არაფინანსური აქტივების შესაძენად, ხოლო 87% სააგენტოს საოპერაციო საქმიანობის დასაფინანსებლად.