2021 წლის განმავლობაში საქართველოში მოსახლეობა 40 000-ით შემცირდა. დემოგრაფიული მდგომარეობის გაუარესებაში მნიშვნელოვანი წვლილი შეიტანა COVID-19-ის პანდემიამ, რომლის შედეგადაც მხოლოდ გასულ წელს 12 000 ადამიანი გარდაიცვალა.
2021–ში გარდაცვალების ოფიციალურმა სტატისტიკამ 59 906 შეადგინა.
მიიღე ინფორმაცია უფრო სწრაფად „კომერსანტის“ Telegram-ზე.
სტატისტიკოს სოსო არჩვაძის შეფასებით, გასულ წელს მოსახლეობის შემცირება კიდევ უფრო მეტი იქნებოდა, რომ არა საქართველოს არარეზიდენტი მოქალაქეების შემოსვლა, რომელიც დადებითი სალდო შეადგინა ე.ი. გაცილებით მეტი საქართველოს მოქალაქე გავიდა, ვიდრე შემოვიდა, ამის გარეშე უფრო მძიმე სურათი იქნებოდა.
,,2020 წელს დაახლოებით 2500 იყო კოვიდით გარდაცვალებათა რაოდენობა, ხოლო 2021 წელს ამ მაჩვენებელმა 11 500 შეადგინა. ეს ნიშნავს, რომ შარშან ყოველი მეოთხე კოვიდით გარდაცვლილი იყო. თუ კოვიდის გარდაცვლილების სტატისტიკას გამოვრიცხავთ, 2020-2021 წლებში გარდაცვალებათა რაოდენობა არც ისე მნიშვნელოვნადაა გაზრდილი (დაახლოებით 1000) და ეს შეიძლება დავუკავშიროთ სტრესს და იმ მძიმე ვითარებას, რაც პანდემიის გავრცელებას მოჰყვება. ერთია, რომ კოვიდით ხდება ლეტალური შემთხვევის დადგომა და მეორე, ადამიანების განცდა თავის ახლობლებზე, თავის ჯანმრთელობაზე და ესეც ნეგატიურად მოქმედებს საბოლოოდ - არცთუ იშვიათად ლეტალური შედეგით სრულდება. ამდენად, კოვიდის ფაქტორი რომ არ ყოფილიყო, შობადობისა და გარდაცვალების მაჩვენებლები ერთმანეთს დააბალანსებდნენ.
გარდაცვალებათა მიზეზი რომ დაიდება, აშკარად გამოჩნდება, რომ კოვიდპანდემიამ თავისი გავლენა მოახდინა სიცოცხლის საშუალო ხანგრძლივობაზე. ამ საშიში ვირუსით გარდაცვალებათა ასეთი მაღალი სიხშირე რომ არა, ჩვენ სიცოცხლის საშუალო ხანგრძლივობა რამდენადმე მაღალი გვექნებოდა იმასთან შედარებით, რაც გამოქვეყნდა“, - აცხადებს არჩვაძე ,,კომერსანტთან“.
კერძოდ, ,,საქსტატის“ მონაცემების მიხედვით, პანდემიამ შეამცირა საქართველოში სიცოცხლის საშუალო მოსალოდნელი ხანგრძლივობაც. თუკი 2020 წელს ის ქალებისთვის 77.7 წელი იყო, 2021 წელს 75.4 წლამდე შემცირდა, კაცებისთვის კი 69.1 წლიდან 67.5 წლამდე.
ამასთან, გაიზარდა საქართველოდან ემიგრაციაც, რამაც მოსახლეობის რაოდენობაზე ასევე ნეგატიური გავლენა იქონია (მინუს 25,966 ადამიანით). შედეგად საქართველოს მოსახლეობა -39,926-ით, ანუ 1.1%-ით, შემცირდა.
მარი ჩიტაია