საქართველოში ალკოჰოლური სასმელების ერთ-ერთმა უმსხვილესმა მწარმოებელმა სს „სარაჯიშვილმა“ 2021 წელს - 25,23 მლნ ლარის საერთო მოგება მიიღო, ხოლო წმინდა მოგებამ 11,5 მლნ ლარი შეადგინა. შესაბამისად საანგარიშო პერიოდში საერთო მოგების მარჟა 53%, ხოლო წმინდა მოგების მარჟა 24% დაფიქსირდა. ბოლო ოთხი წლის განმავლობაში კომპანიის წმინდა მოგება 1,4-ჯერ, ხოლო საერთო მოგება 1,6-ჯერ გაიზარდა.
2021 წელს სს სარაჯიშვილი და შვილობილი კომპანიების მიერ რეალიზებული პროდუქციის ღირებულებამ 47,7 მლნ. ლარი შეადგინა. ეს მაჩვენებელი 17%-ით აღემატება წინა წლის გაყიდვებს. 2018 და 2019 წლებში შემოსავლები პროდუქციის რეალიზაციიდან დინამიურად იზრდებოდა, ხოლო 2020 წელს COVID-19 პანდემიასთან დაკავშირებით მოხდა რეალიზაციის შემცირება. 2021 წელს COVID-19 პანდემიის უარყოფითი ეფექტის შესუსტების შედეგად მოხდა შემოსავლების ზრდა.
2021 წლის გაყიდვებში 20% ადგილობრივ, ხოლო 80% საექსპორტო ბაზრებს ეკავა. საანგარიშო პერიოდში კომპანიის პროდუქცია 24 საექსპორტო ქვეყანაში იყო წარმოდგენილი, თუმცა კომპანიის მთავარი საექსპორტო ბაზარი რუსეთია. 2021 წელს ოთხი უმსხვილესი საექსპორტო ბაზარი იყო: რუსეთი (32%), ბელორუსი (22%), უკრაინა (22%), შოტლანდია (3%) და ყაზახეთი(9%). ამ ქვეყნების საერთო წილმა ექსპორტის 88% შეადგინა.
მომზადებულ დოკუმენტში ვკითხულობთ, რომ „სს სარაჯიშვილი და შვილობილი კომპანიების შემოსავლების 80%-ზე მეტი საექსპორტო ბაზრებზე მოდის, სადაც დიდი წილი პოსტსაბჭოთა ქვეყნებს უკავიათ. ბოლო წლების განმავლობაში ამ ქვეყნების ეკონომიკური მდგომარეობა არ იყო მდგრადი. ადგილი ქონდა მთლიანი შიდა პროდუქტის ზრდის მკვეთრ ცვლილებებს, ეროვნული ვალუტების დევალვაციას, ინფლაციას, უმუშევრობის დონის მერყეობას და ა.შ. მათი ეკონომიკური მდგომარეობის გაუარესება მკვეთრად აისახება სს სარაჯიშვილის და შვილობილი კომპანიების გაყიდვების დინამიკაზე. ამ გარე ფაქტორის თავიდან ასაცილებლად კომპანია მუდმივად მუშაობს დივერსიფიცირების მიმართულებით, რაც ახალი - ურთიერთდამოუკიდებელი ბაზრების მოძიებაში მდგომარეობს“.
აღსანიშნავია, რომ 2021 წელს სს სარაჯიშვილი გახდა შპს ბრენდ მაღაზია სარაჯიშვილის 50% წილის, შპს ადმირალის 37,5% წილის და შპს გეო ნათსის 12,5% წილის მფლობელი. აღნიშნულმა ინვესტიციამ შეადგინა 0,7 მლნ. ლარი.