სპეციალისტების შეფასებით, 2021 წელს მაღალი ეკონომიკური ზრდა სოფლის მეურნეობაზეც წარმატებით აისახა და განსაკუთრებით აგრო პროდუქტების ექსპორტი წაახალისა. ამის შესახებ ,,კომერსანტთან“ ექსპერტი სოფლის მეურნეობის საკითხებში, პროფესორი პაატა აროშიძე საუბრობს.

მისი თქმით, განსაკუთრებით აღსანიშნავია ის გარემოება, რომ ევროკავშირის წევრ ქვეყნებსა და საქართველოს შორის სავაჭრო-ეკონომიკური ურთიერთობები პანდემიის პერიოდში უფრო მეტად განმტკიცდა.

,,2021 წელს  მნიშვნელოვანი იყო მაღალი ზრდა ეკონომიკაში, რაც ჯერჯერობით ფიქსირდება. სხვა სიტუაციაა, როგორ შენარჩუნდება წლის განმავლობაში. პანდემიიდან გამომდინარე, ეკონომიკური პროცესები ამოძრავდა. ხალხი მიუბრუნდა სოფლის მეურნეობას. არავინ იცოდა, რა ბედი ეწეოდა აგრარულ სფეროს, რა მომავალი იქნებოდა, თუმცა მეტი პერსპექტივა დაინახეს, ემიგრირებულთა დიდი რაოდენობა ქალაქიდან სოფლად დაბრუნდა. ამან სასოფლო-სამეურნეო პროდუქციის წარმოებაზე გავლენა მოახდინა. ჯერ კიდევ გაურკვევლობაში ვიმყოფებით, მაგრამ მივეჩვიეთ პანდემიასთან თანაცხოვრებას. შესაბამისად, წელს საექსპორტო პროდუქცია გაიზარდა, ექსპორტმა მაქსიმუმს მიაღწია, სავაჭრო ბალანსი დადებითად გადაიხარა, რაც 2021 წლის ერთ-ერთი ყველაზე დიდი მიღწევაა. ეკონომიკური ზრდა 10-15 წლის განმავლობაში ყველაზე დიდია, თუმცა ბევრი რამ დასახვეწია, როგორც პრემიერ-მინისტრმა ირაკლი ღარიბაშვილმა აღნიშნა, 1 სულ მოსახლეზე მშპ-ს მოცულობა უნდა გაიზარდოს. ტენდენციები თუ შენარჩუნდება, უფრო მეტი შედეგი მიიღწევა. მართალია, მაღალი ეკონომიკური ზრდა მუდმივად არ იქნება, თუმცა ობიექტური სიტუაციიდან გამომდინარე მიღწევები მეტნაკლებად დადებითად შეიძლება შეფასდეს“, - აცხადებს პაატა აროშიძე.

როგორც მეცნიერი აღნიშნავს, ევროკავშირის წევრობის ისტორიული მისიის შესრულებამდე გადამწყვეტია ეკონომიკური ინტეგრაცია ევროკავშირთან, რისთვისაც პრინციპულად მნიშვნელოვანია სავაჭრო ურთიერთობების გამყარება ევროკავშირის წევრ ქვეყნებთან, ხოლო შედეგი იმაზეა დამოკიდებული, რამდენად სწორად შეასრულებს რეკომენდაციებს საქართველო.

აგრო პროდუქტის ექსპორტის ზრდის მთავარ პირობად კი აროშიძე ხარისხის გაუმჯობესებას და ქართული პროდუქტის ცნობადობის ზრდას მიიჩნევს.

შეგახსენებთ, რომ 2021 წლის იანვარ-ნოემბერში ექსპორტი 3 822.9 მლნ. აშშ დოლარს შეადგენს და გასულ წელთან შედარებით მატება 26.7 პროცენტია. 

საქსტატის ცნობით, ექსპორტი რეექსპორტის გარეშე, მთლიანი ექსპორტის 73.5 პროცენტს შეადგენს. აღნიშნული მაჩვენებელი წინა წლის შესაბამის პერიოდთან შედარებით 28.7 პროცენტით გაიზარდა და 2 809.6 მლნ. აშშ დოლარს გაუტოლდა. 

მარი ჩიტაია