ბევრისთვის 2021 წელი იმედისმომცემი იყო, რადგან კორონავირუსის ვაქცინები უფრო ხელმისაწვდომი გახდა, თუმცა პანდემია კიდევ ერთი წელი გაგრძელდა. მიუხედავად იმისა, რომ ტექნოლოგია განვითარებას განაგრძობს, წლის განმავლობაში ძალიან მოულოდნელი ჩავარდნებიც მოხდა, თან ისეთი გიგანტური კომპანიებისგან, ვისგანაც საზოგადოება ამას ყველაზე ნაკლებად ელოდა.
წარმოგიდგენთ 2021 წლის ყველაზე შესამჩნევ ტექნიკურ წარუმატებლობებს:
Facebook და LinkedIn -დან პერსონალური მონაცემების გადინება
აპრილში კიბერუსაფრთხოების ექსპერტებმა განაცხადეს, რომ Facebook -ის ნახევარი მილიარდი მომხმარებლის პირადი ინფორმაცია, მათ შორის ტელეფონის ნომრები, დაბადების დღეები და ელექტრონული ფოსტის მისამართები, გამოქვეყნდა ვებსაიტზე, რომელსაც ჰაკერები იყენებდნენ. ამ ინციდენტმა კიდევ ერთხელ აჩვენა, თუ რამდენად დაუცველი შეიძლება იყვნენ კომპანიები, რომლებიც აგროვებენ დიდი რაოდენობით პერსონალურ მონაცემებს.
აპრილში, LinkedIn-მა დაადასტურა, რომ ჰაკერების ვებსაიტზე გასაყიდად საჯაროდ იყო გამოტანილი დაახლოებით 500 მილიონი მომხმარებლის პირადი ინფორმაცია, რომელიც მათი საიტიდან წაიღეს. მაშინ Linkedin-მა განაცხადა, რომ გასაყიდად გამოტანილი მონაცემთა ბაზა იყო „ფაქტობრივად, მონაცემთა კოლექცია მრავალი ვებსაიტისა და კომპანიისგან“.
Citizen აპლიკაციამ პოლიციას შეცდომით სხვა მოქალაქე დააჭერინა
მაისში, სტარტაპმა Citizen, რომელიც დანაშაულის სიგნალებს რეალურ დროში აგზავნის, საზოგადოებას ერთ-ერთი ეჭვმიტანილის დასაკავებლად 30,000 დოლარის ჯილდო შესთავაზა. გამოქვეყნებული ფოტოს მიხედვით, მამაკაცი მალე დააკავეს, თუმცა ერთი ძალიან დიდი პრობლემა იყო, აღმოჩნდა, რომ ის შეცდომით იქნა ამოცნობილი. კომპანიამ ახალი პროდუქტი თავის OnAir აპლიკაციაში ეჭვმიტანილის შესახებ ინფორმაციის გადასაცემად გამოიყენა, მაგრამ განაცხადა, რომ თავად მონაცემები არ გადაუმოწმებიათ.
პროგრამული შეტევები და გამოსასყიდი
Ransomware თავდასხმები ამ წელს გაიზარდა. ჰაკერები სხვადასხვა კომპიუტერულ სისტემაზე წვდომის მოპოვების შემდეგ კომპანიას გამოსასყიდს სთხოვდნენ. მაისში ერთ-ერთმა მთავარმა თავდასხმამ ხაზი გაუსვა აშშ-ს ინფრასტრუქტურის დაუცველობას ასეთი დანაშაულების მიმართ.
ორმა გათიშვამ ინტერნეტის უმეტესი ნაწილი გამორთო
ეს ორ კვირაზე ნაკლებ დროში ორჯერ მოხდა: ტექნიკურ კომპანიებში მოულოდნელი გათიშვის გამო ინტერნეტი გაითიშა. ხარვეზები სწრაფი და ხანმოკლე აღმოჩნდა, მაგრამ ამან ხაზი გაუსვა იმას, თუ რამდენად დამოკიდებულია კაცობრიობა ინტერნეტზე.
პირველი გათიშვისას, 8 ივნისს, უამრავი ვებსაიტი, მათ შორის Reddit, CNN, Amazon და მრავალი სხვა, ხაზგარეშე გავიდა Fastly-ის კონტენტის მიწოდების ქსელში შეფერხების გამო. შემდეგ, 17 ივნისს, მსგავსი კომპანიის, Akamai Technologies-ის პრობლემამ გატეხა ვებსაიტები, მათ შორის, Southwest Airlines-ის, United Airlines-ის, Commonwealth Bank of Australia-სა და ჰონგ კონგის საფონდო ბირჟის მფლობელობაში.
ძალიან ცუდი დღე Facebook-თვის
4 ოქტომბერი, მართლაც საშინელი იყო კომპანიისთვის, რომელსაც მალე META ეწოდა.
Facebook -ის ინფორმატორმა ფრენსის ჰაუგენმა გამოავლინა მისი ვინაობა და თქვა, რომ კომპანიამ იცოდა, როგორ იყენებდნენ სოციალურ მედიას დეზინფორმაციის, სიძულვილის ენისა და ძალადობის გასავრცელებლად. (ადრე, ჰაუგენი იყო უსახელო წყარო, რომელიც კომპანიის შიდა ინფორმაციებს The Wall Street Journal-ში ავრცელებდა.)
შემდეგ, ორშაბათს დაფიქსირდა სერიოზული შეფერხება Facebook-ზე, WhatsApp-სა და Instagram-ზე. სამივე აპლიკაცია რამდენიმე საათით ოფლაინ იყო. ამ დროს აქციების ღირებულება დაეცა.
ოქტომბრის ბოლოს, 17 ამერიკული საინფორმაციო ორგანიზაციის კონსორციუმმა დაიწყო საკუთარი სტატიების გამოქვეყნება SEC-ის საფუძველზე. კონსორციუმმა განიხილა კონგრესის მიერ მიღებული რედაქტირებული ვერსიები. ეს ისტორიები მოიცავდა დეტალებს იმის შესახებ, თუ როგორ იყენებენ კოორდინირებული ჯგუფები ფეისბუკს ძალადობის გასაძლიერებლად და როგორ იყენებენ ტრეფიკერები სოციალურ მედიას ხალხის ექსპლუატაციისთვის.
Tesla-ს თვითმართვადი ავტომობილი მძღოლებს აშინებს
Tesla-ს აღმასრულებელი დირექტორი ელონ მასკი მისი ინოვაციური სისტემით, რომელიც ავტომობილის თვითმართვას გულისხმობს, დიდი ხანია თავს იწონებს. თუმცა სისტემა ამ დრომდე დასახვეწია. გარდა ამისა, ჯერჯერობით მხოლოდ რამდენიმე მძღოლმა სცადა ეს ფუნქცია, მათ შორის მომხმარებელთა ჯგუფმა, რომლებიც „ბეტა“ ვერსიაზე წვდომისთვის 10,000 დოლარს იხდიდნენ.
მიუხედავად იმისა, რომ ეს ფუნქცია შეიძლება ფანტასტიურად ჟღერდეს, მძღოლებმა, რომლებმაც ის გამოიყენეს, ნოემბერში CNN Business-ს განუცხადეს, რომ თავს დაცულად ვერ გრძნობენ.
წყარო: CNN, BPN.GE
წარუმატებლობები
