როგორი იყო 2022 წელი სამშენებლო და სარემონტო მასალების კომპანია „ნოვასთვის“ და როგორია 2023 წლის მოლოდინები ამ და სხვა თემებზე რადიო „კომერსანტის“ საახალწლო ეთერში კომპანიის გენერალურმა დირექტორმა ედიშერ ხიმშიაშვილმა ისაუბრა.
მისივე თქმით 2022 წლის მთავარი ამოცანა „ნოვასთვის“ რითეილის გაფართოება და 4 ახალი ფილიალის დამატება იყო, რასაც რეალურად კომპანიამ მიაღწია.
„2022 წლის მთავარი ამოცანა ჩვენთვის რითეილის გაფართოება და 4 ახალი ფილიალის დამატება იყო, რეალურად ეს გეგმა კომპანიამ შეასრულა. 2022 წელს ჩვენ თელავის, გორის, მარნეულის და ხაშურის ფილიალები დაგვემატა, გარდა ამისა განვავითარეთ სამი ახალი საწარმო. ეს არის წებო-ცემენტის vetek - ის ბრენდის ქვეშ წარმოება და ფასადის საიზოლაციო ენერგოეფექტური მასალის წარმოება, ასევე ლითონის მილების წარმოებაც. რაც შეეხება გაყიდვებს, 2022 წელი ამ მიმართულებით საკმაოდ სტაბილური იყო“, - აღნიშნა ედიშერ ხიმშიაშვილმა.
კომპანიის დირექტორის თქმით „ნოვას“ მთავარი უპირატესობა არის ის, რომ კომპანია დღეს 500 - ზე მეტი დასახელების პროდუქტს აწარმოებს და ეს რიცხვი 2023 წელს 700-ს გადააჭარბებს, რაც კომპანიას ქართული პროდუქტის ერთ-ერთ მსხვილ მწარმოებლად აქცევს.
„კონკურენტული უპირატესობა გამოიხატება იმაში, რომ საბოლოო მომხმარებლამდე ჩვენ შეგვიძლია „ნოვას“ წარმოებული ექსკლუზიური ბრენდების მომხმარებლამდე საქართველოს 7 დიდ ქალაქში მიტანა და ეს ჩვენ პრიორიტეტად რჩება, „ნოვა“ საქართველოს მასშტაბით უდიდესი სადისტრიბუციო კომპანიაა, გარდა ამისა ახალი წარმოებები გვაძლევს იმის საშუალებას, რომ პროდუქციის ექსპორტი იმაზე დიდი რაოდენობით განვახორციელოთ, რა რაოდენობასაც აქამდე კომპანია ახდენდა“, - აღნიშნა ედიშერ ხიმშიაშვილმა
ხიმშიაშვილის თქმით 2022 წელს ომის და ჩინეთში არსებული კოვიდ პანდემიის გამო ლოგისტიკა გართულებული იყო, რამაც ფასებზე გარკვეული გავლენა მოახდინა.
„ზოგადად ჩვენ სექტორში ფასების კუთხით განსხვავებული მდგომარეობაა, არის გარკვეული პროდუქტები, რომლებზეც ფასები იზრდება, გარკვეულზე იკლებს. მაგალითად ისეთი პროდუქტებზე, რომლებიც თურქეთზე ან ევროპაზეა დამოკიდებული ფასები იზრდება, რადგან ენერგომატარებლებზე ფასები მნიშვნელოვნად გაიზარდა და ლოგისტიკური პრობლემები არსებობს, რაც შეეხება ჩინეთის ბაზარს გარკვეულ პროდუქტებზე ფასები შემცირდა. ყველაზე მნიშვნელოვანი ბაზარი კი, რომელიც მეტალის ბაზარია და კომპანიის მთავარი ბიზნესი, მასზე ფასები საგრძნობლად შემცირებულია“, - აღნიშნა ედიშერ ხიმშიაშვილმა.
ედიშერ ხიმშიაშვილმა აღნიშნა, რომ 2023 წლის ნომერ პირველი ამოცანა ახლად გახსნილი სამი საწარმოს ექსპლუატაციაში გაშვება, ახალი ფილიალების სტაბილურად ამუშავება, რითეილის განვითარება და ექსპორტის გაზრდაა.
თაკო კვაჭანტირაძე