2022 წელს საქართველოს ელექტროსადგურებმა ჯამში 14,247 მლნ. კილოვატსაათი ელექტროენერგია გამოიმუშავა, რაც წლის წლიური გამომუშავების რეკორდული მაჩვენებელია, როგორც ISET-PI-ს მიერ მომზადებულ „ელექტროენერგიის ბაზრის მიმოხილვაში“ წერია, 2022 წლის მაჩვენებელი, წინა წელთან შედარებით, სრული წარმოების 13%-იან ზრდას წარმოადგენს (2021 წელს სრული წარმოება 12,645 მლნ. კილოვატსაათი იყო). ელექტროენერგიის წარმოების ყოველწლიური ზრდა ჰიდროელექტროსადგურების (+6%), თბოელექტროსადგურების(+42%) და ქარისელექტროსადგურების (+5%) მიერ გამომუშავებული ენერგიის წარმოების ზრდამ განაპირობა.
„წარმოების უდიდესი წილი ჰიდროელექტროსადგურებზე (ჰესი) მოდის. ჰიდროელექტროსადგურებში წარმოებული ელექტროენერგიის წლიურმა მაჩვენებელმა რეკორდულ ნიშნულს მიაღწია. 2022 წელს ჰესების მიერ ელექტროენერგიის წარმოება 10,771 მლნ. კილოვატსაათს გაუტოლდა (სრული წარმოების 75.6%); ქარის ელექტროსადგურების წარმოება - 88 მლნ. კილოვატსაათს (სრული წარმოების 0.6%); თბოელექტროსადგურების (თესების) წარმოება - 3,388 მლნ. კილოვატსაათს (სრული წარმოების 23.8%).
„ელექტროენერგიის მოხმარებამ ადგილობრივ ბაზარზე 14,181 მლნ. კილოვატსაათი შეადგინა, რაც აგრეთვე რეკორდული წლიური მაჩვენებელია. მთლიანობაში, მოხმარებული ელექტროენერგია 2022 წელს 3%-ით გაიზარდა 2021 წელს არსებულ 13,753 მლნ. კილოვატსაათთან შედარებით. 2022 წელს, გამომუშავებულმა ელექტროენერგიამ, მოხმარებას 65 მლნ. კილოვატსაათით გადააჭარბა თბოელექტროსადგურების რეკორდულად მაღალი გამომუშავების მეშვეობით), რაც სრული წარმოების 0.5%-ს შეადგენდა (2021 წელს წარმოებასადა მოხმარებას შორის სხვაობამ 1,108 მლნ. კილოვატსაათი შეადგინა, რაც 2021 წელს სრული წარმოების 9%-ს, ხოლო სრული მოხმარების 8%-ს გაუტოლდა).
ელექტროენერგიაზე მოთხოვნა შემდეგნაირად გადანაწილდა: ენერგო-პრო ჯორჯია 1 (31% - 4,388 მლნ. კილოვატსაათი), თელასი (21% - 3,023 მლნ. კილოვატსაათი), აფხაზეთი (21% - 3,029 მლნ. კილოვატსაათი) და პირდაპირი მომხმარებლები (26%-3,726 მლნ. კილოვატსაათი.წლიური მოთხოვნა აფხაზეთისგან(+3%), თელასისგან (+7%), და პირდაპირი მომხმარებლებისგან (+5%), გაიზარდა, ხოლო ენერგო-პრო ჯორჯიასგან შემცირდა (-0.3%).
2022 წელს საქართველომ 1,533 მლნ. კილოვატსაათი ელექტროენერგიის იმპორტი განახორციელა (აღნიშნული მაჩვენებელი 24%-ით ნაკლებია 2021 წელს იმპორტირებულ 2,006 მლნ. კილოვატსაათთან შედარებით). ზედიზედ მეორე წლის განმავლობაში, რუსეთი მთავარი იმპორტიორი იყო. ენერგიის 83% რუსეთიდან შემოვიდა (საყურადღებოა ის ფაქტი, რომ აღნიშნული ელექტროენერგიის 71% აფხაზეთს მიეწოდა), თურქეთიდან - 9%, ხოლო აზერბაიჯანიდან - 8%.
2022 წელს ელექტროენერგიის ექსპორტი 148%-ითგაიზარდა, 2021 წელს არსებული 391 მლნ. კილოვატსაათიდან, 971 მლნ. კილოვატსაათამდე . ელექტროენერგიის ექსპორტში მთავარი პარტნიორი თურქეთი იყო, სადაც ექსპორტირებული ენერგიის 89%გავიდა. თურქეთის შემდეგ, ექსპორტირებული ენერგიის ყველაზე დიდი ნაწილი (10%) სომხეთში, დარჩენილი 1% კი - აზერბაიჯანში გავიდა“, - აღნიშნულია ISET-ს მიერ გამოქვეყნებულ ინფორმაციაში.
2022 წელს ელექტროენერგიის იმპორტის საშუალო შეწონილი ფასი წლიურად 4%-ით გაიზარდა (2021 წელს არსებული 7.84 თეთრიდან კილოვატსაათზე - 8.17 თეთრამდე კილოვატსაათზე). 2022 წელს ელექტროენერგიის ექსპორტის საშუალო შეწონილი ფასი წლიურად 134%-ით გაიზარდა (2021 წელს არსებული 10.77 თეთრიდან კილოვატსაათზე - 25.17 თეთრამდე კილოვატსაათზე).