Forbes-2022-ის დოლარის მილიარდერების გლობალურ რეიტინგში 30 წლამდე ასაკის 12 ადამიანი მოხვდა. მათი საერთო ქონება ჟურნალმა 25,8 მლრდ დოლარად შეაფასა. ახალგაზრდა მილიარდერების რეიტინგში ოთხი ახალბედაა და ყველა მათგანმა ქონება დამოუკიდებლად გამოიმუშავა.

ყველაზე მდიდარი ახალგაზრდა მილიარდერების სამეული ასეთია:

• გერი ვანი - 29 წლის ამერიკელი, რომლის ქონებაც 5,9 მლრდ დოლარს შეადგენს. მან, სემ ბენკმან-ფრიდთან ერთად, FTX კრიპტოვალუტის ბირჟა დააარსა, რომელიც 2019 წელს ამოქმედდა. FTX ვაჭრობის მოცულობით მსოფლიოში კრიპტო ბირჟის ხუთეულში შედის. Bloomberg-ის მონაცემებით, დღეში ტრანზაქციების მოცულობამ შესაძლოა, 15 მლრდ დოლარს მიაღწიოს.

• რაიან ბრესლოუ - 27 წლის მილიარდერმა სტენფორდის უნივერსიტეტი დატოვა და ონლაინ გადახდის სერვისი, Bolt დააარსა. Forbes-მა მისი ქონება 2 მლრდ დოლარად შეაფასა. წლის დასაწყისში ბრესლოუმ კომპანიის აღმასრულებელი დირექტორის პოსტი დატოვა.

• პედრო ფრანჩესკი და ენრიკე დუბურგასი - საკრედიტო ბარათების სტარტაპ Brex-ის დამფუძნებლები. ორი ახალგაზრდა მეწარმიდან თითოეული 1,5 მლრდ დოლარის ქონებას ფლობს. დღეისთვის Brex 12,3 მლრდ დოლარად არის შეფასებული.

Forbes-ის მონაცემებით, წელს 12 ახალგაზრდა მილიარდერიდან ხუთმა ქონება მემკვიდრეობით მიიღო, შვიდმა კი ბიზნესი თვითონ წამოიწყო. გასულ წელს Forbes-ის სიაში 30 წლამდე ასაკის 10 მილიარდერი შევიდა, თუმცა მათი საერთო ქონება, წლევანდელ ჯგუფთან შედარებით, 3,7 მლრდ დოლარით მეტი იყო. გამოცემა ამას საფონდო ბირჟების არასტაბილურობითა და FTX ბირჟის თანადამფუძნებლის, სემ ბენკმან-ფრიდის 30 წელზე უფროსი ასაკის მილიარდერების კატეგორიაში გადასვლით ხსნის. მას მარტში 30 წელი შეუსრულდა. 2021 წელს ბენკმან-ფრიდი 30 წლამდე ასაკის ყველაზე მდიდარი მილიარდერი გახდა.

წყარო: "ბიზნესპრესნიუსი"