მთავრობამ პარლამენტს 2022 წლის ბიუჯეტის პირველადი პროექტი გაუგზავნა, რომლიდანაც ირკევა, რომ, მომავალ წელს მთავრობა 3.1 მილიარდი ლარის ახალი საგარეო ვალის აღებას გეგმავს. 2022 წლის ბიუჯეტის პროექტის მიხედვით, 3.1 მილიარდი ლარის საგარეო სესხებთან ერთად, მთავრობა სახაზინო ვალდებულებებისა და ობლიგაციების გამოშვებით 1.3 მილიარდი ლარის შიდა ვალს აიღებს. ჯამურად, 2022 წელს მთავრობა 4.4 მილიარდით გეგმავს ვალდებულებების ზრდას. რაც შეეხება, ვალების გასტუმრებას, მთავრობა გაისად აპირებს გაისტუმროს 1.2 მილიარდამდე სავალო ვალდებულება, საიდანაც 1.2 მილიარდი საგარეო ვალის დაფარვას მოხმარდება.
2022 წლის ბოლოსთვის მთავრობის მთლიანი ვალდებულებები საპროგნოზო მშპ-ის 52.1%-ზე არის დაგეგმილი.
ვისგან რამდენის სესხებას გეგმავს მთავრობა გაისად იხილეთ ქვემოთ:
- საქართველოს მთავრობისათვის გამოსაყოფი გრძელვადიანი საინვესტიციო, შეღავათიანი კრედიტები საერთაშორისო საფინანსო ორგანიზაციებისა და უცხო ქვეყნების მთავრობების მიერ − 1.9 მილიარდი ლარი.
- აზიის განვითარების ბანკიდან (ADB) მისაღები სახსრები ფისკალური მდგრადობის და სოციალური დაცვის პროგრამისთვის - 318 მილიონი ლარი.
- აზიის განვითარების ბანკიდან (ADB) მისაღები სახსრები წყალმომრაგებისა და წყალარინების სექტორის მდგრადი განვითარებისთვის - 150 მილიონი ლარი.
- აზიის განვითარების ბანკიდან (ADB) მისაღები სახსრები კლიმატზე მორგებული ირიგაციის სექტორის განვითარებისთვის - 190 მილიონი ლარი.
- მსოფლიო ბანკიდან (WB) მისაღები სახსრები განვითარების პოლიტიკის ღონისძიება-2022 პროგრამისთვის (DPO-2022) - 157 მილიონი ლარი.
- საფრანგეთის განვითარების სააგენტოდან (AFD) მისაღები სახსრები სოციალური კეთილდღეობის პროგრამა-IV-ისთვის – 109 მილიონი ლარი.
- საფრანგეთის განვითარების სააგენტოდან (AFD) მისაღები თანხა წყალმომრაგებისა და წყალარინების სექტორის მდგრადი განვითარების პროგრამისთვის - 109 მილიონი ლარი.(ADB-ს II ტრანშის თანადაფინანსება).
- საფრანგეთის განვითარების სააგენტოდან (AFD) მისაღები თანხა საქართველოში ენერგეტიკის სექტორის რეფორმის პროგრამა- V-ისთვის – 164 მილიონი ლარი.
ცნობისთვის, მიმდინარე წლის ზაფხულზე საქართველოს მთავრობამ ევროკავშირის მაკრო-ფინანსური დახმარების 75 მილიონი ევროს ტრანშზე უარი თქვა ვალის შემცირების მოტივით, თუმცა 2020 წელს ვალის ზრდის გეგმა ანალიტიკოსებს უმძაფრებს განცდას, რომ ღარიბაშვილის მთავრობის უარი ევროკავშირის დახმარებაზე პოლიტიკუ აქტი უფრო იყო, რაც სპეციალისტების ვარაუდით უკაშირდება ამ სესხის წინაპირობას,- სასამართლო სისტემის რეფორმის შეუსრულებლობას.
ავტორი: ბელა გელაშვილი
საგარეო ვალი
