2022 წლის განმავლობაში მოზიდულმა სადაზღვევო პრემიამ პირდაპირი დაზღვევის საქმიანობიდან შეადგინა 909,6 მილიონი ლარი. ამის შესახებ ინფორმაცია, დაზღვევის ზედამხედველობის სამსახურის მიერ გამოქვეყნებულ ანგარიშშია მოცემული.

ამავე პერიოდის შედეგებით მზღვეველების სადაზღვევო მოგებამ შეადგინა 210,3 მილიონი ლარი, წმინდა მოგებამ კი 39,2 მილიონი ლარი (2021 წელს 40 მლნ ლარი იყო).

სადაზღვევო კომპანიების აქტივების ჯამური მოცულობა შეადგენს 1 105,5 მილიონ ლარს, ხოლო კაპიტალი 343,2 მილიონ ლარს.

საქართველოს მოსახლეობის 18 პროცენტი სარგებლობს კერძო სამედიცინო დაზღვევით, ასევე საქართველოში რეგისტრირებული ავტომობილების მხოლოდ 7 პროცენტია დაზღვეული. 2022 წლის 12 თვეში 682,152 სამედიცინო დაზღვევის პოლისი იყო მოქმედი. ავტოდაზღვევის კუთხით კი, 114,447 პოლისი იყო გაყიდული.

2022 წლის 12 თვის მონაცემებით, მოზიდული სადაზღვევო პრემიით ბაზარზე „ჯიპიაი“ (165 მლნ. ლარი) ლიდერობს, მას მოსდევს „თიბისი“ (153 მლნ ლარი) , მესამე ადგილზე „ალდაგი“ (137 მლნ ლარი), მეოთხე ადგილზეა „არდი“ (85 მლნ ლარი), ხოლო მეხუთე ადგილს სადაზღვევო კომპანია „იმედი L“ (83 მლნ ლარი)  იკავებს.

2022 წლის 12 თვეში ყველაზე დიდი მოცულობით ზარალი კომპანია „ჯიპიაიმ“ (111 მლნ ლარი) აანაზღაურა. ანაზღაურებული ზარალის მოცულობით მეორე ადგილზეა „თიბისი“ (66 მლნ ლარი), მესამეზე კი „არდი“ (54 მლნ ლარი). მეოთხე ადგილს „იმედი L“ (52 მლნ ლარი) იკავებს, მეხუთეს კი „ალდაგია“ (46 მლნ ლარი).

2022 წლის 31 დეკემბრის მდგომარეობით რეგისტრირებულია 18 სადაზღვევო კომპანია, რომლებიც ფლობენ სიცოცხლის და არასიცოცხლის დაზღვევის ლიცენზიას.