„საქსტატის“ მონაცემებით საქართველოში 1,5 მილიონი მანქანაა, აქედან მხოლოდ 0,5 %-ია ელექტრომობილი. როგორც რადიო „კომერსანტის“ გადაცემა „პროფესიონალების“ ეთერში, სემეკის ელექტროენერგეტიკის დეპარტამენტის წარმომადგენელმა, თორნიკე აფრიაშვილმა განაცხადა, 2022 წელს იმპორტირებული ელექტრომობილების მაჩვენებელი გაორმაგებულია. ჰიბრიდული მანქანების წილი ავტოპარკში 10%-ითაა გაზრდილი და, წინა წლების მსგავსად, ელექტრომობილების რიცხვი იმპორტის საერთო რაოდენობის 1%-ს არ აღემატება.
ქვეყანაში ელექტრომობილები ძირითადად ამერიკის შეერთებული შტატებიდან შემოდის, პოპულარულია ასევე აზიური წარმოების მანქანები, რომლებიც უფრო იაფია. მანქანების უმრავლესობა მეორადია, თუმცა შემოდის ახალი მანქანებიც.
„2022 წლის იანვრიდან სექტემბრის ჩათვლით საქართველოში 151 ცალი Tesla შემოვიდა, რაც ძალიან მისასალმებელია. მე მგონი იქითკენ მივდივართ, რომ Prius-ების ქალაქიდან ტესლების ქალაქში აღმოვჩნდებით“, - განაცხადა „ი-სპეისის“ წარმომადგენელმა, გიორგი დავითაიამ რადიო „კომერსანტის“ გადაცემა „პროფესიონალების“ ეთერში.
ელექტრომობილების მთავარ ნაკლად ის მიიჩნევა, რომ სრული დამუხტვის შემდეგ ისინი დიდი მანძილის დაფარვას ვერ ახერხებენ. კომპანია „ი-სპეისის“ დამტენებმა ეს პრობლემა სწრაფი დამტენებით გადაჭრა. მათი დახმარებით ნებისმიერი ელექტრომობილი თბილისიდან ბათუმამდე შეფერხების გარეშე შეძლებს ჩასვლას. 7 ასეთი დამტენი მთავარ მაგისტრალზე, მულტიფუნქციურ ცენტრებშია განთავსებული.
„Nissan Leaf-ი, რომელსაც 24-კილოვატიანი ბატარეა და 7-კილოვატიანი გარდამქმნელი აქვს, დაახლოებით 4 საათში იმუხტება; სწრაფი დამტენით, რომელიც მაგისტრალზე გვაქვს განთავსებული, იგივე Nissan Leaf-ი 28,8 წუთში დაიმუხტება. სწრაფი დამუხტვის საფასური დაახლოებით 10 ლარამდეა“, — განაცხადა გიორგი დავითაიამ „კომერსანტის“ ეთერში.
ამას გარდა, „ი-სპეისმა“ შექმნა აპლიკაცია და ბიზნეს-მოდული, რომელიც ნებისმიერ მსურველს საშუალებას აძლევს, აპლიკაციაში საკუთარი დამტენი ჩართოს, დააწესოს დამუხტვის საფასური და შემოსავალი მიიღოს.
ელექტრომობილების პოპულარიზაციის საქმეში აქტიურადაა ჩართული სემეკი. როგორც რადიო „კომერსანტის“ ეთერში თორნიკე აფრიაშვილმა განაცხადა, ელექტრომობილები გათავისუფლებული არიან აქციზის გადასახადისგან.
„სემეკმა მნიშვნელოვანი ცვლილება განახორციელა გამანაწილებელი ქსელის წესებში, რომელიც ქსელთა მიერთების საკითხს ეხება. დღეის მდგომარეობით გამანაწილებელ ქსელზე მომხმარებლის მიერთება რეგულირდება სემეკის მიერ და შესაბამისი პაკეტის ძაბვის და სიმძლავრის საფეხურის მიხედვით კონკრეტული ფასია დადგენილი. ეს ფასი ელექტრომობილების დამტენი სადგურებისთვის განახევრდა. ელექტრომობილის მძღოლებს ახლა უკვე შეღავათიან ფასად შეუძლიათ ავტომობილის დამუხტვა.
არის ასევე ნეტო აღრიცხვის სისტემა, რომელიც გულისხმობს იმას, რომ ელექტრომობილისა და დამტენი სადგურის მფლობელებს აქვთ შესაძლებლობა, რომ ააშენონ განახლებად ელექტროენერგიაზე მომუშავე ელექტროსადგური, რომელსაც ამ ნეტოაღრიცხვის სისტემაში ჩართავენ, რაც სადგურის მიერ მოხმარებული ელექტროენერგიის გაქვითვას გულისხმობს. ჩვენ ფეხი ავუბით და მივდევთ ევროპულ პრაქტიკას და გამოცდილებას. გვინდა, რომ საქართველოში ელექტრომობილების პოპულარიზაციას მაქსიმალურად შევუწყოთ ხელი“,- განაცხადა თორნიკე აფრიაშვილმა.
მაკა ბიბილაშვილი