სამშენებლო კომპანია „არსის“ გენერალურმა დირექტორმა ბესო ორთოიძემ რადიო „კომერსანტის“ დილის ეთერში 2022 წლის შეჯამებისას განაცხადა, რომ წელს უძრავი ქონების სექტორი რეკორდულად, 20-25%-ით გაიზარდა, მაგრამ მომავალ წელს ბაზარზე მოთხოვნა შედარებით დაიკლებს და ზრდა 10%-მდე იქნება.

„წელი წარმატებული იყო. ყველა მაჩვენებლით გაუმჯობესდა არა მხოლოდ გასული წლის, არამედ პანდემიამდელი მონაცემები. წლის ჭრილში 20-დან 25%-მდე ზრდა იყო და ეს რეკორდული მაჩვენებელია. მომავალი წლიდან პროცესი ბუნებრივ კალაპოტში ჩადგება და თუ რამე სხვა გაუთვალისწინებელმა გარემო ფაქტორებმა არ იქონია გავლენა, ზრდა 10%-ზე მეტი არ იქნება,“ - განაცხადა ბესო ორთოიძემ.

„არსის“ გენერალური დირექტორის თქმით, პანდემიამ მომხმარებლის ქცევა შეცვალა, ადამიანები უძრავ ქონებას განიხილავდნენ არა მხოლოდ როგორც საცხოვრებელ ფართს, არამედ როგორც საინვესტიციო აქტივს. ამის ფონზე, რუსეთის აგრესიამ, ომმა და ემიგრანტების ეფექტმა იჯარის ღირებულება გაზარდა. ამას დაემატა ინფლაცია, მაგრამ გაზრდილი ფასების მიუხედავად, მოთხოვნა მაინც გაიზარდა,“ - განაცხადა ბესო ორთოიძემ.

რაც შეეხება 2023 წელს, „არსში“ ახალი პროექტის დაწყებას არ გეგმავენ. მიმდინარე წელს დაწყებული 2 მასშტაბური პროექტი უნდა დაასრულონ და კომპანიის ზრდა-განვითარებაზე იქნებიან ორიენტირებული.

„ჩვენი პროექტები „შენი სახლი უნივერსიტეტის ქუჩაზე“ და „შენი სახლი ლისზე“ რამდენიმე წელზეა გათვლილი იმიტომ, რომ ისინი ათეულობით ნაგებობისა და კორპუსისგან შედგება. მომავალ წელს ახალი პროექტის დაწყებას არ ვგეგმავთ. მიმდინარე პროექტები საკმაოდ მასშტაბურია, მათ განვითარებას შევეცდებით და ზრდაზე ვიქნებით ორიენტირებული“, - განაცხადა ბესო ორთოიძემ.

მოამზადა მაკა ბიბილაშვილმა