Galt&Taggart-მა საგარეო ვაჭრობა და მონეტარული პოლიტიკა მიმოიხილა. კომპანია საქსტატის მონაცემებზე დაყრდნობით აღნიშნავს, რომ 2022 წლის აპრილში ექსპორტი წლიურად 10.1%-ით გაიზარდა და 415.7 მლნ აშშ დოლარი შეადგინა, წინა თვის 26.3%-იანი (411.4 მლნ აშშ დოლარი) ზრდის შემდეგ. აპრილში, იმპორტის ზრდა დაჩქარდა და წლიურად 25.3%-ით გაიზარდა 947.2 მლნ აშშ დოლარამდე, წინა თვეში დაფიქსირებული 16.0%-იანი ზრდის შემდეგ. შესაბამისად, სავაჭრო დეფიციტი წლიურად 40.4%-ით გაიზარდა აპრილში და 531.5 მლნ აშშ დოლარი შეადგინა, წინა თვის 8.6%-იანი ზრდის შემდეგ. ჯამურად, 2022 წლის პირველ 4 თვეში, სავაჭრო ბალანსი წლიურად 34.4%-ით გაუარესდა და 2.1 მლრდ აშშ დოლარი შეადგინა, რადგან ექსპორტი 32.8%-ით გაიზარდა 1.6 მლრდ აშშ დოლარამდე, ხოლო იმპორტი 33.7%- ით გაიზარდა 3.7 მლრდ აშშ დოლარამდე.

„საქართველოს ეროვნული ბანკის მონეტარული პოლიტიკის კომიტეტმა 2022 წლის 11 მაისს რეფინანსირების განაკვეთი უცვლელად 11.0%-ზე დატოვა, მას შემდეგ, რაც განაკვეთი 50 საბაზისო პუნქტით გაზარდა მარტში. სებ-ის თანახმად, აპრილში წლიური ინფლაცია მაღალი იყო (12.8%), რადგან მსოფლიო მასშტაბით გაზრდილი ფასები საქართველოს ბაზარსაც გადმოეცა - უკრაინაში საომარი მოქმედებების გამო რუსეთის მიმართ დაწესებულმა სანქციებმა და მიწოდების შეზღუდვებმა, მსოფლიო ბაზრებზე საქონლის გარკვეული კატეგორიების ფასები მნიშვნელოვნად გაზარდა. ცენტრალურმა ბანკმა აღნიშნა, რომ ბოლო პერიოდში ლარის გამყარებამ იმპორტირებული საქონლის ინფლაციის შენელებას შეუწყო ხელი. ამასთან, ბოლო პერიოდში, ნომინალური ხელფასების ზრდასთან ერთად ადგილი აქვს ჯამური პროდუქტიულობის ზრდას, რაც იმაზე მიუთითებს, რომ ამ ეტაპზე შრომის ბაზრიდან ინფლაციაზე მნიშვნელოვანი წნეხი არაა. სებ-ის მიმდინარე პროგნოზით, ინფლაცია წლის ბოლომდე მიზნობრივ მაჩვენებელზე მაღლა შენარჩუნდება, თუმცა, წინა წლის ერთჯერადი ფაქტორების მილევის შედეგად და გამკაცრებული პოლიტიკის ფონზე, მას შემცირების მიმართულება ექნება. გარდა ამისა, სებ-ის განახლებული პროგნოზით, საქართველოს ეკონომიკა 4.5%-ით გაიზრდება 2022 წელს (წინა პროგნოზით ზრდა 3-4%-ის ფარგლებში იყო მოსალოდნელი). ამასთან, მონეტარული პოლიტიკა გამკაცრებული დარჩება მანამ, სანამ ინფლაციურ მოლოდინებზე ზრდის მიმართულებით არსებული რისკები საკმარისად არ შერბილდება. მონეტარული პოლიტიკის კომიტეტის შემდეგი სხდომა 2022 წლის 22 ივნისს ჩატარდება“, — აღნიშნავენ Galt&Taggart-ში.