2022 წლის ეკონომიკური ზრდის პროგნოზი 9.2%-მდე გავზარდეთ საბაზისო სცენარში, წინა 7.6%-დან. აღნიშნულ პროგნოზში მე-4 კვარტალში ვპროგნოზირებთ ზრდის შენელებას გლობალური ზრდის მოსალოდნელი შენელებიდან გამომდინარე, — ამის შესახებ Galt&Taggart-ის კვირის მიმოხილვაშია აღნიშნული.
ორგანიზაციის პროგნოზით, თუ ძლიერი საგარეო შემოდინებების დინამიკა წლის ბოლომდე გაგრძელდა, წლის მე-2 ნახევარში გლობალური ზრდის შენელების მიუხედავად, ოპტიმისტურ სცენარში საქართველოს ეკონომიკური ზრდა 10.6% იქნება.
„საქსტატის წინასწარი მონაცემებით, 2022 წლის ივნისში საქართველოს რეალური მშპ-ის წლიურმა ზრდამ 7.2% შეადგინა, წინა თვის 11.6%-იანი ზრდის შემდეგ. ჯამურად, 2022 წლის პირველ ნახევარში საქართველოს ეკონომიკა წლიურად 10.5%-ით გაიზარდა. ფაქტიური და მიმდინარე მონაცემების გათვალისწინებით, 2022 წლის ეკონომიკური ზრდის პროგნოზი 9.2%-მდე გავზარდეთ საბაზისო სცენარში, წინა 7.6%-დან. აღნიშნულ პროგნოზში მე-4 კვარტალში ვპროგნოზირებთ ზრდის შენელებას გლობალური ზრდის მოსალოდნელი შენელებიდან გამომდინარე. თუმცა, თუ ძლიერი საგარეო შემოდინებების დინამიკა წლის ბოლომდე გაგრძელდა, წლის მე-2 ნახევარში გლობალური ზრდის შენელების მიუხედავად, ოპტიმისტურ სცენარში საქართველოს ეკონომიკურ ზრდას 10.6%-ზე ვპროგნოზირებთ. ივნისში ზრდა დაფიქსირდა მასპინძლობის, ტრანსპორტის, სამთომოპოვებითი მრეწველობის და კომუნიკაციების, ხოლო შემცირდა დამამუშავებელი მრეწველობის, მშენებლობის და უძრავი ქონების დარგებში“, — აღნიშნულია მიმოხილვაში.
Galt&Taggart-ის მიმოხილვაში საუბარია საბანკო სექტორზეც. მათი ინფორმაციით, კომერციული ბანკების მიერ გაცემული სესხები წლიურად 11.3%-ით გაიზარდა 2022 წლის ივნისში (+1.2% თ/თ), წინა თვის 9.1%-იანი ზრდის შემდეგ, და 43.7 მლრდ ლარი შეადგინა, ხოლო საბანკო სექტორში განთავსებული დეპოზიტების წლიური ზრდა 17.4%- მდე დაჩქარდა 2022 წლის ივნისში, წინა თვეში დაფიქსირებული 13.1%- იანი ზრდის შემდეგ გაცვლითი კურსის ეფექტის გამორიცხვით და 38.3 მლრდ ლარი შეადგინა.
„გაცვლითი კურსის ეფექტის გამორიცხვით, სესხების პორტფელის წლიურმა ზრდამ ივნისში 18.7% შეადგინა (+2.1% თ/თ), მაისის 18.1%- იანი ზრდის შემდეგ. სექტორების მიხედვით, ივნისში გაცვლითი კურსის ეფექტის გამორიცხვით, კორპორატიული დაკრედიტების წლიური ზრდა 16.9%-მდე დაჩქარდა, წინა თვის 15.7%-იანი ზრდის შემდეგ, ხოლო საცალო დაკრედიტება წლიურად, უცვლელად, 20.4%-ით გაიზარდა. ამასთან, იპოთეკური სესხების პორტფელის წლიური ზრდა 14.2% იყო ივნისში, წინა თვის 13.9%-იანი ზრდის შემდეგ. 2022 წლის ივნისში სესხების დოლარიზაცია 48.3%-მდე შემცირდა (-4.06პპ წ/წ და -0.39პპ თ/თ), ხოლო უმოქმედო სესხებმა 1.9% (-0.36პპ წ/წ და -0.08პპ თ/თ) შეადგინა.
ვალუტების მიხედვით, ივნისში დაჩქარდა როგორც ლარის, ისე უცხოური ვალუტის დეპოზიტების წლიური ზრდა, რომელმაც, შესაბამისად, 16.6% (11.8% წ/წ იყო წინა თვეში) და 17.9% (13.9% იყო წინა თვეში) შეადგინა გაცვლითი კურსის ეფექტის გამორიცხვით. ამასთან, ივნისში დეპოზიტების დოლარიზაცია 57.9%- მდე შემცირდა (-2.08პპ წ/წ და -0.21პპ თ/თ)“, — ნათქვამია ყოველკვირეულ მიმოხილვაში.