2023 წელს გადამუშავებული ტვირთების 30-35%-ით ზრდას ვგეგმავთ, — ამის შესახებ „კომერსანტთან“ შპს „კარგო პარსელის“ ბათუმის ტერმინალის დირექტორმა ირაკლი ღოღობერიძემ, მომავალი წლის გეგმებზე საუბრისას აღნიშნა.
მისი თქმით, წლევანდელი წელი გამორჩეულად დატვირთული იყო, თუმცა დარწმუნებულია, რომ გაზრდილი ტვირთბრუნვა მომავალშიც შენარჩუნდება.
„2022 მნიშვნელოვანი წელი იყო, რადგან დაახლოებით 500 000 ტონამდე ტვირთი გადაამუშავა ჩვენმა ტერმინალმა. განვიხილავთ რამდენიმე მსხვილ პროექტს ცენტრალური აზიიდან, მაგალითად მეტალის, ნახშირის და სხვადასხვა ტვირთებზე არის მოთხოვნა გაზრდილი და ამ მიმართულებით გააქტიურებას ვაპირებთ. იმედი გვაქვს, რომ მომდევნო წელს მივაღწევთ უფრო მაღალ ნიშნულს და დაახლოებით 30-35%-ით გავზრდით მაჩვენებლებს. ვემზადებით და შესაბამის ინფრასტრუქტურასაც ვავითარებთ, იმისათვის, რომ 2023 წელს 800 000 ტონამდე გავზარდოთ გადამუშავებული ტვირთის რაოდენობა.
ჩვენი მოლოდინია, რომ გაზრდილი ტვირთბრუნვა აუცილებლად შენარჩუნდება. ვფიქრობთ, რომ ეს დინამიკა მზარდი იქნება და მომავალშიც შევინარჩუნებთ არსებულ ნაკადებს, მითუმეტეს რომ ფორმალური მხარეები უფრო გამარტივდა. საქართველოს დღეს მიეცა შანსი, რომ გაათმაგოს ტვირთბრუნვა და ამისთვის საჭიროა ქვეყანაც მზად დახვდეს ამ ვითარებას, შესაბამისად მნიშვნელოვანია საკანონმდებლო ცვლილებები. შექმნილმა გეოპოლიტიკურმა ვითარებამ ტვირთების გადმომისამართება საქართველოს გავლით მოახდინა, თუმცა ეს არ დაიკარგება. რამდენიმე მსხვილ კომპანიასთან ვისთანაც დღეს ვაწარმოებთ მოლაპარაკებას და ხელშეკრულების გაფორმებას ვიწყებთ, პირობებში ჩადებული გვაქვს ვალდებულება, რომელიც გულისხმობს მრავალწლიან პარტნიორობას და თუ ტვირთების ის მინიმუმი რაც განსაზღვრულია ხელშეკრულებით არ შემოვა, მოხდება თანხობრივი ჯარიმა/ანაზღაურება. ხელშეკრულებებში ამ ტიპის ჩანაწერზე თანხმობა კი უკვე ნიშნავს, რომ კომპანიები გეგმავენ მრავალწლიან თანამშრომლობას, შესაძლოა არა იმ რაოდენობით როგორც ახლაა, თუმცა მაინც შენარჩუნდება. აქედან გამომდინარე, დარწმუნებული ვარ საქართველოს სატრანსპორტო არხს ისინი არ დაკარგავენ“, — აღნიშნა ირაკლი ღოღობერიძემ.
2022 წლის პირველ ნახევარში საქართველოში ჯამური ტვირთბრუნვა, 2021 წლის იმავე პერიოდთან შედარებით, 5%-ითაა გაზრდილი. აღნიშნულ პერიოდში საავტომობილო გზით სულ 13.5 მილიონი ტონა ტვირთი, რკინიგზით კი 6.8 მილიონი ტონა ტვირთი გადაიზიდა. 2022 წლის II კვარტალში სატრანზიტო გადაზიდვები 29%-ით გაიზარდა. ზრდა, უმეტესწილად, თურქეთზე, რუსეთზე, უზბეკეთსა და ყაზახეთზე მოდის. ეკონომიკის სამინისტროს ინფორმაციით, 2022 წელს შუა დერეფანში სატვირთო ბრუნვა 30 პროცენტით გაიზარდა.