2023 წელს „ბილაინში“ რებრენდინგი იგეგმება, ამის შესახებ განცხადება რადიო „კომერსანტის“ ეთერში „ვიონი საქართველოს“ საზოგადოებასთან ურთიერთობების ხელმძღვანელმა სოფო ბალავაძემ დაანონსა.
სოფო ბალავაძე კომპანიისთვის 2022 წელს წარმატებულს უწოდებს და მნიშვნელოვან მოვლენებს შორის გამოყოფს იმ ფაქტს, რომ 2022 წელს „ბილაინის“ ბრენდის სახელით ცნობილი მობილური კავშირის კომპანიის 100%- იანი წილის მფლობელი, სრულად ქართული ბიზნესჯგუფი გახდა.
„მიმდინარე წელი საბოლოო ჯამში კომპანიისთვის ძალიან წარმატებული და ძალიან მნიშვნელოვანი იყო. კომპანიაში შეიცვალა მფლობელი. ძალიან ბევრი გეგმა გაქვს, რისთვისაც აქტიურად ვემზადებოდით 2022 წელს, რათა 2023 წელს სიახლეებით წარმოვადგინოთ“, - განაცხადა ბალავაძემ.
მისივე თქმით, კომპანია აქტიურად გააგრძელებს ციფრულ პროდუქტებზე მუშაობას და ამ მიმართულებით განვითარებას.
„2023 წელს ვაგრძელებთ ციფრულ პროდუქტებზე მუშაობას, რადგანაც მიგვაჩნია, რომ ჩვენ უფრო ციფრული კომპანია ვართ, ვიდრე ტელეკომუნიკაციების კომპანია. 2023 წელს გაგრძელდება ასევე ქსელის გაუმჯობესებაზე მუშაობა და რაც უკვე დავაანონსეთ იქნება ბრენდის ცვლილება.
კონკურენციის ყოველთვის ძალიან აქტუალური იყო ამ სექტორში. საქართველო დიდი ბაზარი არ არის და წარმოდგენილია სამი კომპანიით, რაც უწყობს ხელს ბაზრის სიჯანსაღეს. მნიშვნელოვანი აქცენტი გაქვს ინტერნეტის მოხმარებაზე და ჩვენი კომპანია გამოირჩევა ბაზარზე იმით, რომ საკუთარი მომხმარებლის მიერ ინტერნეტის გამოყენების მხრივ წამყვანი ვართ ინტერნეტის მომხმარებლის და ასევე 4G-ს მომხმარებლებს რაოდენობით“, - განაცხადა ბალავაძემ.
შეგახსენებთ, რომ 2022 წელ კომპანია „სიბიეს ჯგუფმა“ „ვიონი საქართველოს“ მფლობელ საერთაშორისო კომპანია VEON-თან, რამდენიმე წლის განმავლობაში მიმდინარე მოლაპარაკებები წარმატებით დაასრულა.
კომპანიის სათაო ოფისი ნიდერლანდებში- ამსტერდამში მდებარეობს და მისი აქციები NASDAQ-ისა (აშშ) და Euronext Amsterdam-ის ბირჟებზე არის განთავსებული. გარიგების შედეგად, „ბილაინის“ ბრენდის სახელით ცნობილი მობილური კავშირის კომპანიის 100%- იანი წილის მფლობელი, სრულად ქართული ბიზნესჯგუფი გახდა.
კერძოდ, საქართველოში რეგისტრირებული მსხვილი ბიზნეს ჰოლდინგის - „სიბიეს ჯგუფის“ დამფუძნებელ ხვიჩა მაქაცარიასა და „ვიონი ჯეორჯია ჰოლდინგს B.V“-ს შორის გაფორმებული ხელშეკრულების მიხედვით, „ვოთერთრაილ ინდასტრისსა“ და „ინვესტიკო ალიანსეს“ 100-100%-იანი წილები, ქართველი ბიზნესმენის მფლობელობაში გადავიდა.
აღსანიშნავია ისიც, რომ „ბილაინის“ მეშვეობით (მობილური ოპერატორი „ვიონი საქართველო“) პირველი მობილური ზარი 2007 წლის 15 მარტს განხორციელდა. მას შემდეგ კომპანია დინამიურად ვითარდება და სადღეისოდ მის 1.4 მილიონ მომხმარებელს უზრუნველყოფს 2G GSM 900/1800MHz, 3G 2100 MHz და 4G 800/1800 MHz უსადენო მომსახურებით.
„ვიონი საქართველო“ სრულად ქართული კომპანიაა, მნიშვნელოვანი საერთაშორისო გამოცდილებითა და გლობალური ტელეკომ ინდუსტრიის საუკეთესო სტანდარტებზე დაფუძნებული ბიზნეს პროცესებით.
„ბილაინი“ მის მომხმარებელს სთავაზობს მაღალტექნოლოგიურ, თანამედროვე პროდუქტებსა და მომსახურებას, რომლებიც აერთიანებენ აბონენტისთვის აუცილებელ და სასურველ ყველა გადაყწვეტას, იქნება ეს ყოველდღიური კავშირისა და ცხოვრებისეული საჭიროებების მოგვარება, თუ საგანმანათლებლო, გართობისა და ჰობის რეალიზაციის შესაძლებლობა. ქვეყანაში ერთ-ერთი ყველაზე განვითარებული ციფრული ეკოსისტემის მქონე კომპანია, „ვიონი საქართველო“ ქართულ ბაზარზე პირველი ციფრული მობილური ოპერატორია.