დღეისათვის არსებული სტატისტიკური მაჩვენებლების მიხედვით, ნეტო აღრიცხვის სისტემაში ჩართული განახლებადი ენერგიებიდან ქსელს 32 423 კვტ/სთ ელექტროენერგია მიეწოდება, საიდანაც თელასის ქსელში მიწოდება 12 911 კვტ/სთ-ია, ხოლო ენერგო-პრო ჯორჯიას ქსელში 19 512 კვტ/სთ. მთლიანობაში თელასის ქსელში, ამ დროისათვის, ჩართულია განახლებადი ენერგიების 200 სუბიექტი, საიდანაც 199 სუბიექტი არის მზის ენერგიაზე მომუშავე სადგური. ხოლო ენერგო პრო ჯორჯიაა ქსელში ჩართულია 396 ობიექტი, საიდანაც მზის სადგურია 385 ერთეული.
მთლიანობაში ქსელში ჩართულია 596 ობიექტი, რომელთა 98%-ი მზის ენერგოსადგურს წარმოადგენს.
როგორც „კომერსანტთან“ სემეკის თავმჯდომარემ დავით ნარმანიამ განაცხადა, ბოლო წლის წლის განმავლობაში ქსელში ჩართული განახლებადი ენერგიების სადგური მზარდ ტრენდზეა და არსებული ზრდა მომავალ წლებშიც შენარჩუნდება.
„განახლებადი ენერგიების პოტენციალი საქართველოს აქვს საკმაოდ დიდი და ის ჯერ კიდევ ასათვისებელია. საუბარია ქარის და მზის ენერგიებზე. ჰიდროენერგიის საკმაოდ დიდი პოტენციალი გვაქვს, ასევეა მწვანე ჰიდროენერგიებიც. არის ასევე ახალი მიმართულებები როგორიცაა წყალბადი, ბიომასა, ნარჩენების გადამუშავებიდან მიღებული ენერგია და სხვა. ამიტომაც ამ სხვადასხვა მიმართულებების ხელშეწყობა რაც ხორციელდება არის მნიშვნელოვანი, რომელიც შეიძლება ორ ნაწილად დავყოთ. ესაა ნახევარ მგვტ-მდე ანუ მიკრო სიმძლავრე, რომელსაც ჩვენ ვარეგულირებთ სემეკი და ასევე არის ნახევარ მგვტ-ზე მეტი, რომლის ხელშეწყობის სქემა რამდენიმე დღის წინ დაამტკიცა მთავრობამ განახლებადი ენერგიების ხელშეწყობის მექანიზმის სახით“, - განაცხადა დავით ნარმანიამ.
სემეკის თავმჯდომარის განმარტებით, 0,5 მგვტ-მდე სიმძლავრის ნეტო აღრიცხვის სისტემაში ჩართული განახლებადი ენერგიების წყაროები რაც არის, მას შემდეგ რაც მარეგულირებელმა კომისიამ კანონმდებლობა და მარეგულირებელი ნორმები კიდევ უფრო დახვეწა ძალიან სწრაფად დაიწყო განვითარება.
1თუ 2016-2020 წლებში 4 მგვტ-მდე იყო სისტემაში ჩართული განახლებადი ენერგიების წყაროები, მარტო 2 წლის განმავლობაში თითქმის 30 მგვტ-ია ქსელში ჩართული“, - აღნიშნა ნარმანიამ.
სემეკის თავმჯდომარის გათვლებით, 2023 წელს განახლებადი ენერგიების სადგურების ჩართულობა მინიმუმ 30%-ით გაიზრდება.
„2023 წელს 2022 წელთან შედარებით მნიშვნელოვანი ზრდა იქნება იმიტომ, რომ ხელშემწყობი მექანიზმები კიდევ უფრო განვითარდა და დაიხვეწა და მეორე, არის ბევრი, რომელსაც შეკვეთილი აქვს და ჯერ დაინსტალირებული არ არის. აქედან გამომდინარე კიდევ უფრო მეტად განვითარდება. თან ქვეყანაში დაიწყო შემოსვლა, ახალი განახლებადი ენერგიების სისტემებმა, როგორებიცაა ქარის მინი ელექტროსადგურები, რომელიც სახლის სახურავზე მონტაჟდება“, - განაცხადა დავით ნარმანიამ.