2023 წლისთვის განკუთვნილი ECMT მრავალმხრივი ნებართვების მისაღებად განცხადებების მიღება 13 ოქტომბრის ჩათვლით გაგრძელდება, - აღნიშნულის შესახებ ინფორმაციას სსიპ -სახმელეთო ტრანსპორტის სააგენტო ავრცელებს.
ირკვევა, რომ 2023 წლისთვის განკუთვნილი ECMT ნებართვების საერთო რაოდენობის 2/3 განაწილდება „EURO VI უსაფრთხო“კატეგორიის ავტოსატრანსპორტო საშუალებაზე, ხოლო ამავე ნებართვების 1/3 - „EURO V უსაფრთხო“ კატეგორიის ავტოსატრანსპორტო საშუალებაზე;
2023 წლისთვის განკუთვნილი ECMT ნებართვა იტალიის და საბერძნეთის რესპუბლიკის ტერიტორიული შეზღუდვის გარეშე გაიცემა „EURO V უსაფრთხო“, „EURO VI უსაფრთხო“ კატეგორიის ავტოსატრანსპორტო საშუალებისთვის.
2023 წლისთვის განკუთვნილი ECMT ნებართვა ავსტრიის და რუსეთის ფედერაციის ტერიტორიული შეზღუდვის გარეშე გაიცემა მხოლოდ არანაკლებ „EURO VI უსაფრთხო“ კატეგორიის ავტოსატრანსპორტო საშუალებისთვის.
· ნებართვა გაიცემა საქართველოში რეგისტრირებულ გადამზიდველზე, რომელსაც გააჩნია საკუთრებაში და/ან ლიზინგის ვალდებულებითი სამართლებრივი ფორმით საქართველოში რეგისტრირებული (გარდა დროებითი რეგისტრაციისა) „EURO V უსაფრთხო“ ან „EURO VI უსაფრთხო“ კატეგორიის არანაკლებ 5 ავტოსატრანსპორტო საშუალება;
· თუ მეწარმის მხრიდან მოთხოვნილი ნებართვების რაოდენობა ნაკლებია 5 ერთეულზე, გარდა ნებართვის მისაღებად წარმოდგენილისა, სრულად წარმოდგენილი უნდა იქნეს მეწარმის საკუთრებაში ან ლიზინგის ვალდებულებითი სამართლებრივი ფორმით მფლობელობაში არსებული, არანაკლებ 5 ერთეული „EURO IV უსაფრთხო“, „EURO V უსაფრთხო“ ან „EURO VI უსაფრთხო“ კატეგორიის ასს-ების რეგისტრაციის მოწმობების ასლები;
ასევე, გადამზიდველს მფლობელობაში არსებული იმ ავტოსატრანსპორტო საშუალების მიმართ, რომელზეც მოთხოვნილია ნებართვა, გაცემული უნდა იყოს ,,სატვირთო ავტომობილის და მისაბმელის გზისთვის ვარგისობის ტესტის ECMT” ვადიანი სერტიფიკატი;
იმავდროულად, გადამზიდველს უნდა გააჩნდეს სათანადო ფინანსური რესურსი, მინიმალური თანხა, რომელიც განისაზღვრება ერთი ავტოსატრანსპორტო საშუალებისათვის 9000 ევროს ეკვივალენტი ლარში, ხოლო ყოველი შემდგომი ავტოსატრანსპორტო საშუალებისათვის – 5000 ევროს ეკვივალენტი ლარში იმ ავტოსატრანსპორტო საშუალების რაოდენობის გათვალისწინებით, რომელზეც მოთხოვნილია შესაბამისი ნებართვა. ფინანსურ რესურსად შესაძლოა გათვალისწინებულ იქნას გადამზიდველის საკუთრებაში არსებული უძრავი ქონება.