სარეიტინგო სააგენტო S&P Global-ის პროგნოზით, 2023 წელს საქართველოს ეკონომიკა 2.5%-ით, 2024 და 2025 წელს კი 4.5%-ით გაიზრდება.
ანგარიშის მიხედვით 2022 წელს მიგრანტების და ფულადი გზავნილების მაღალმა შემოდინებამ ხელი შეუწყო ეკონომიკურ ზრდას და გააძლიერა რეგიონში არსებული ბანკების დაფინანსების წყაროებიც, მაგრამ S&P Global-ში მიიჩნევენ, რომ ეს ზემოქმედება, სავარაუდოდ დროებითია და მისი მასშტაბები ქვეყნების მიხედვით განსხვავდება. რეგიონის საბანკო სექტორებისთვის ინფლაცია, ვალუტის ცვალებადი კურსი და საგარეო დაფინანსების რეფინანსირების აუცილებლობა მატერიალურ რისკებად რჩება.
S&P Global 2023 წელს რეგიონში ვალუტის ცვალებადობის ზრდას ელის. ანგარიშის მიხედვით, თანდათანობით შემცირებული სესხების დოლარიზაცია საქართველოში, სომხეთსა და უზბეკეთში ზრდის პოტენციურ საკრედიტო რისკს. სომხეთსა და საქართველოში ბანკები ისევ გასცემენ საცალო იპოთეკური და სამომხმარებლო სესხებს უცხოურ ვალუტაში, თუმცა შეზღუდული მოცულობით.
„2023 წელს სომხეთის, აზერბაიჯანის, საქართველოს, ყაზახეთისა და უზბეკეთის საბანკო სექტორები გააგრძელებენ პოსტპანდემიურ აღდგენას, რაც, რეგიონში გაზრდილი გეოპოლიტიკური დაძაბულობის მიუხედავად, ხელს შეუწყობს ეკონომიკური ზრდის პერსპექტივას.
განვითარებად ქვეყნებში საოპერაციო პირობები ბანკებისთვის ხელსაყრელი იქნება. მოველით, რომ ბანკებს შეუძლიათ გაზარდონ ახალი ბიზნესის თაობა, სტაბილურ მოგებასთან ერთად, და თანდათან გააუმჯობესონ აქტივების ხარისხი“, — აღნიშნულია ანგარიშში.
S&P Global-ის ინფორმაციით, რუსეთ-უკრაინის კონფლიქტის დაწყების შემდეგ, საერთაშორისო ბიზნესის რუსეთიდან გასვლის გამო, ადამიანები, კაპიტალი და ვაჭრობა ხუთ ქვეყანაში მიედინებიან. მიგრანტების რაოდენობის დიდმა ზრდამ კი იმ ქვეყნებში უძრავი ქონების ფასებისა და იჯარა გააძვირა, რამაც შეიძლება გამოიწვიოს ეკონომიკური დისბალანსის გაღრმავება.
S&P Global
