თიბისი კაპიტალის ვარაუდია, რომ წელს მაღალი საბაზო ეფექტისა და გლობალური ზრდის შემცირების გამო, მომავალ წელს საქართველოს ეკონომიკა 3.9%-ით გაიზრდება, — ამის შესახებ „თიბისი კაპიტალის“ ყოველკვირეულ განახლებაშია აღნიშნული.

„2022 წელს, თიბისი კაპიტალის პროგნოზის მიხედვით, ეკონომიკის ზრდამ 10.6%-ს რომ მიაღწიოს, ეს ნიშნავს, რომ მომდევნო თვეებში წლიური ზრდა მაღალი იქნება, თუმცა ყოველთვიური სეზონურად შესწორებული მაჩვენებელი ეკონომიკური აქტივობის დანორმალიზებაზე მიუთითებს. ასევე, თიბისი კაპიტალის ვარაუდია, რომ წელს მაღალი საბაზო ეფექტისა და გლობალური ზრდის შემცირების გამო, მომავალ წელს საქართველოს ეკონომიკა 3.9%-ით გაიზრდება. შესაბამისად, მომსახურებისა და ზოგადად მოთხოვნის მხრიდან ინფლაციაზე ზეწოლაც თავის უფრო ბუნებრივ დონეს დაუბრუნდება“, — ნათქვამია განახლებაში.

აღსანიშნავია, რომ 2023 წლის ბიუჯეტის პროექტის მიხედვით, ეკონომიკური ზრდა 5 პროცენტის ფარგლებშია დაგეგმილი. რაც შეეხება საერთაშორისო ორგანიაციებს, რამდენიმე დღის წინ გამოქვეყნებული მსოფლიო ბანკის ინფორმაციის მიხედვით, 2023 წელს საქართველოში ეკონომიკური ზრდა სავარაუდოდ 4.2%-მდე შენელდება, რაც 2022 წელს მძლავრი აღდგენის სტიმულის შესუსტებას, ევროკავშირში ეკონომიკური ზრდის შემცირებას და 2023 წელს რუსეთში წარმოებული პროდუქციის მოცულობის მოსალოდნელზე მკვეთრ ვარდნას ასახავს. აზიის განვითარების ბანკის პროგნოზის განახლებული ვერსიის მიხედვით კი საქართველოს მთლიანი შიდა პროდუქტის ზრდა 2023 წელს 6%-ით არის მოსალოდნელი.