2023 წელს, როგორც ტურიზმის, ასევე ავიაციის კუთხით, საკმაოდ პოზიტიური მოლოდინები არსებობს. ამის შესახებ „კომერსანტთან“ ეკონომიკისა და მდგრადი განვითარების მინისტრის მოადგილემ მარიამ ქვრივიშვილმა ისაუბრა.
„ვხედავთ, რომ იზრდება პირდაპირი საჰაერო მიმოსვლები, განსაკუთრებით სპარსეთის ყურის ქვეყნების და ევროპის მიმართულებით. წელს სასიხარულო ინფორმაცია გვქონდა ის, რომ ტაილანდიდან გვაქვს პირდაპირი რეისები, რამაც ბიძგი მისცა შორი ქვეყნებიდან პირდაპირი რეგულარული ფრენების არსებობას. შესაბამისად, 2023 წელს შედარებით ამბიციური გეგმები გვაქვს. იმედი გვაქვს, რომ პოსტპანდემიურ პერიოდში ავიაკომპანიებთან მოლაპარაკებები კიდევ უფრო დადებითი შედეგებით დაიხურება“, - აცხადებს მარიამ ქვრივიშვილი.
მარიამ ქვრივიშვილის განმარტებით, 2022 წელს ავიაციის კუთხით საკმაოდ დიდი გამოწვევები არსებობდა. პანდემიის შემდეგ გაზრდილი მგზავრთნაკადის ფონზე გლობალურ ავიაციას საკმაოდ ბევრი პრობლემა ჰქონდა. მისი თქმით, მიუხედავად იმისა, რომ ხშირად სურვილი არსებობს, როგორც საქართველოს, ასევე სხვადასხვა ავიაკომპანიების მხრიდან, ავიაკომპანიებს ტექნიკურად ან ფინანსურად ფრენების დაწყების შესაძლებლობა არ აქვთ.
„რა თქმა უნდა, სირთულეები ყველა მიმართულებით არის. ვხედავთ, რომ ევროპის ავიაკომპანიებს საკმაოდ რთული მდგომარეობა აქვთ. დიდი გამოწვევები არსებობს - ადამიანური რესურსი, საავიაციო საწვავის გაძვირება და ა.შ. ხშირია, რომ როდესაც მოლაპარაკებებს ვაწარმოებთ, პირდაპირი რეისების დაწყებაზე ჩვენი და ავიაკომპანიის სურვილი ერთმანეთს ემთხვევა, თუმცა ტექნიკურად ან ფინანსურად შესაძლებლობა არ აქვთ იმისათვის, რომ რეისები შეასრულონ. შესაბამისად, ეს საკმაოდ გრძელვადიანი პროცესია.
შორი მანძილის ქვეყნები მნიშვნელოვანია. ტაილანდი კარგი მაგალითია, ფაქტობრივად, ყველა რეისი ჩამოდის მგზავრებით სავსე. ისტორიაც გვაჩვენებს იმას, რომ შორი მანძილის ქვეყნებს დიდი ეკონომიკური სარგებლის მოტანა შეუძლიათ, არამხოლოდ ავიაციისთვის. მიუხედავად იმისა, რომ საკმაოდ წარმატებული ვართ ავიაციის კუთხით, მაინც არსებობს განვითარების კიდევ უფრო დიდი შესაძლებლობა. მათ შორის, რომ ჩვენს ქვეყანაში ვიხილოთ ავიაკომპანია Emirates, ასევე ისეთი მაღალი დონის ავიაკომპანია, როგორიცაა Saudia, რაც ხელს შეუწყობს გამტარუნარიანობის, რეისების ზრდას და ქვეყნის პოპულარიზაციას“, - აღნიშნა ქვრივიშვილმა.
მინისტრის მოადგილე ამბობს, რომ, ავიაციის განვითარების შემდეგი წლის გეგმა, სრულად ეფუძნება 2023 წლის ტურიზმის განვითარების ხედვას. მისი თქმით, ეკონომიკის სამინისტრო მუშაობს იმაზე, რომ მეტი პირდაპირი რეისი იყოს ევროპის სხვადასხვა მიმართულებით.
„ვმუშაობთ ევროპის სხვადასხვა მიმართულებით მეტი პირდაპირი რეისის არსებობაზე, სპარსეთის ყურის და შორის მანძილის ქვეყნების მიმართულებითაც.
რა თქმა უნდა, სირთულეები ყველა მიმართულებით არის, ვხედავთ, რომ ევროპის ავიაკომპანიებს საკმაოდ რთული მდგომარეობა აქვთ. დიდი გამოწვევები არსებობს. გლობალურად საკმაოდ რთული ვითარებაა და ჩვენი მოლაპარაკებები საკმაოდ სწრაფად ვერ მიმდინარეობს რადგანაც თავად ამ კომპანიას უნდა გააჩნდეს შესაბამისი შესაძლებლობები“, - აცხადებს ქვრივიშვილი.