მთავრობამ პარლამენტს 2023 წლის ბიუჯეტის პირველადი ვერსია წარუდგინა, რომელშიც დოლარის კურსი 2.8462 ნიშნულით განისაზღვრა.
ბიუჯეტის პროექტის მე-4 თავში, რომელიც საქართველოს სახელმწიფო ბიუჯეტის მთლიანი სალდოს, ფინანსური აქტივებისა და ვალდებულებების ცვლილებას მოიცავს, აღნიშნულია, რომ გამოთვლისას გამოყენებულია გაცვლითი კურსები 21 სექტემბრის მდგომარეობით:
1 EUR = 2.8482 GEL;
1 SDR = 3,6718 GEL;
10 CNY = 4.0586 GEL;
100 JPY = 1.9818 GEL;
1 KWD = 9.2110 GEL;
1 USD = 2.8462 GEL.
საქართველოს 2023 წლის სახელმწიფო ბიუჯეტის კანონის პროექტის მიხედვითვე, სახელმწიფო ვალის საპროგნოზო ზღვრული მოცულობა 2023 წლის ბოლოსთვის არაუმეტეს 32,072.8 მლნ ლარის ოდენობით განისაზღვრა, მათ შორის, სახელმწიფო საგარეო ვალისა – 23,654.0 მლნ ლარის ოდენობით, ხოლო სახელმწიფო საშინაო ვალისა − 8,418.8 მლნ ლარის ოდენობით.
ექსპერტების შეფასებით გაურკვეველია რა ბედი ელის ლარის კურსის გრძელვადიან პერსპექტივაში.
გრიგოლ რობაქიძის სახელობის უნივერსიტეტის, ეკონომიკისა და ბიზნესის სკოლის დეკანი ვახტანგ ჭარაია „კომერსანტთან“ განმარტავს, რომ კურსი, რომელიც 2023 წლის ბიუჯეტშია ჩაწერილი, წარმოადგენს იმ დღის კურსს, როდესაც მთავრობამ ბიუჯეტი პარლამენტში წარადგინა.
„გამომდინარე იქედან, რომ ქვეყანაში გვაქვს მცურავი გაცვლითი კურსი შეუძლებელია, სადმე ფიქსირებული კურსი გვქონდეს მთელი წლის განმავლობაში. ისიც გასათვალისწინებელია, რომ ბიუჯეტის წარდგენის ერთ-ერთი მთავარი მნიშვნელოვანი პუნქტია კურსის დაფიქსირება, რომელიც არა მომავალი წლის პროგნოზებს ეყრდნობა, არამედ ეყრდობა მიმდინარე წლის იმ დღის კურსს, როდესაც „ბიუჯეტის შესახებ“ კანონპროექტი პარლამენტს წარედგინება.
შესაბამისად იქ არჩეულია არა გასაშვალოებული ან საპროგნოზო კურსი, არამედ დღევანდელი კურსი, როდესაც განაცხადი შეაქვთ.
მეორე მხრივ, რომ შევხედოთ შეუძლებელია ლარის კურსი ერთ წერტილში იყოს ფიქსირებული და წინასწარ მოვახდინოთ პროგნოზირება. იმიტომ რომ ის არის მცურავი და შესაბამისად წინასწარმეტყველებას გამორიცხავს. პლუს რეგიონში და მსოფლიოში იმდენი რამ ხდება, რომელიც გავლენას ახდენს ქართული ლარის და აშშ-ს დოლარის კურსზე. საკანონმდებლო მოთხოვნაა, რომ მომდევნო წლის ბიუჯეტის წარდგენისას დაფიქსირებული იყოს საორიენტაციო კურსი, რომელიც იმავდროულად არის იმ დღის კურსი როდესაც კანონპროექტი წარდეგინება პარლამენტს“, — აცხადებს ვახტანგ ჭარაია.
„ეს ძნელი სათქმელია რა იქნება ლარის კურსი გრძელვადიან პერსპექტივაში. ლარის კურსის გამყარების მთავარი ეფექტი იყო ის ერთჯერადი შოკი რაც გამოიწვია თანხების შემოდინებამ ემიგრანტების მხრიდან. როგორი იქნება იქნება სამომავლოდ გადმორიცხვების თემა, რაზეც მნიშვნელოვნადაა დამოკიდებული ლარის კურსი ეს ძნელი სათქმელია. ჩვენ ვერ დავადასტურებთ იმას, რომ 2.8462 ნიშნული ეს იქნება საშულო კურსი, რომელიც შენარჩუნდება 2023 წელს. მიუხედავად იმისა, რომ ამ მომენტისათვის ბანკებში უცხოური ვალუტის ჭარბი ლიკვიდობა გვაქვს“, - განუცხადა „კომერსანტს“ საერთაშორისო კვლევებისა და პროგნოზირების ცენტრის ვიცე-პრეზიდენტმა ნიკა შენგელიამ.
4 ოქტომბერის ვაჭრობის შედეგად აშშ დოლარი გაუფასურდა და 2.8150 ლარი შეადგინა. კურსი, რომელიც დღეს მოქმედებდა, 2.8228 ლარი იყო. შესაბამისად, დოლარის ცვლილებამ ეროვნულ ვალუტასთან მიმართებაში 0.78 თეთრი შეადგინა.
გამყარდა ევრო, რომლის კურსი 2.7860 ლარია. მაშინ როცა დღეს მოქმედი კურსი 2.7590 ლარს შეადგენდა. შესაბამისად, ევროს ცვლილებამ 2.70 თეთრი შეადგინა.
გაუფასურდა თურქული ლირა, რომელიც 0.1515 ლარს შეადგენს, ხოლო გამყარდა ფუნტი და 3.1956 ლარი ეღირება.
დღევანდელი ვაჭრობის შედეგად მიღებული კურსები, ხვალიდან 5 ოქტომბერიდან შევა ძალაში.