თბილისი ის იშვიათი გამონაკლისია, სადაც აბონენტებს სასმელი წყალი 24 სთ-იან რეჟიმში მიეწოდებათ, თუმცა 24 სთ-იანი წყალმომარაგება ყოველთვის უწყვეტ წყალმომარაგებას არ გულისხმობს. დაზიანებისა თუ გეგმური სამუშაოების გამო, ხშირად მთელი დღე-ღამე ნახევარ ქალაქს წყალი უწყდება. მოქალაქეების გარდა GWP-ის მიმართ უკმაყოფილებას ბოლო დროს თბილისის მერი კახა კალაძეც აღარ მალავს. კომპანიის ახალ მფლობელს ესპანურ Aqualia-ს 2024 წლამდე ტარიფების ზრდა ეკრძალება. როგორც მინიმუმ ამ პერიოდამდე დედაქალაქში მდგომარეობის კარდინალური გაუმჯობესება მოსალოდნელი არ არის.
ლათინური შრიფტით მიღებული შეტყობინება kselze dazianebaa tsklis mitsodeba shegistskdebat 11:30-dan 23:30-mde… უკვე ჩვეული მოვლენაა რასაც ხშირად მეორე შეტყობინებაც ემატება, რომელიც დაზიანების აღმოფხვრის სავარაუდო დროს კიდევ რამდენიმე საათით ავადებს. ავარიულ დაზიანებებთან ერთად ხშირია გეგმური გამორთვებიც, იმ განსხვავებით, რომ ასეთ შემთხვევაში აბონენტს გათიშვის შესახებ ინფორმაცია რამდენიმე საათით ადრე, ან უკეთეს შემთხვევაში წინა დღით მიეწოდება, რაც გარკვეული რეაგირების საშუალებას ტოვებს.
დაზიანებისგან ბოლომდე დაზღვეული არც განვითარებული სამყაროს ქალაქების ქსელებია პრობლემას დაზიანებათა სიხშირე ქმნის. მეორე პრობლემა გეოგრაფიული მოცვაა. დიღომში გამსკდარმა მილმა შესაძლოა მთელი ჩუღურეთი, ვაკე, საბურთალო და მთაწმინდა-კრწანისი უწყლოდ დატოვოს, ნაძალადევში ჩასატარებელი სარეაბილიტაციო სამუშაოების გამო კი სანზონა გლდანი, თემქა და მუხიანი გაითიშოს.
GWP ხშირად დაბალ ტარიფებს უსვამს ხაზს. გაუმრიცხველიანებელი საყოფაცხოვრებო მომხმარებლისთვის გადასახადი სულზე თვეში 4.52 ლარია გამრიცხველიანებულთათვის ტონაზე 50 თეთრი. კომერციული სექტორისთვის მომსახურების საფასური 1200%-ით ძვირია და ტონაზე 6.50 ლარს შეადგენს. კომპანიის აბონენტთა რაოდენობა 0.5 მლნ-ს აღემატება, საიდანაც 480 000 ფიზიკური პირია, 30 000 - იურიდიული.
მოქალაქეების კრიტიკის შემდეგ, 4 მაისს GWP კალაძემაც გააკრიტიკა, თუმცა რაიმე სანქციაზე ან კონკრეტულ პასუხისმგებლობაზე არ უსაუბრია. მან უფრო მერიის როლზე გადაიტანა აქცენტი და აღნიშნა, რომ მძიმე მდგომარეობაში მყოფ მიწისქვეშა საკომუნიკაციო ქსელს წინა წლებში ყურადღებას არავინ აქცევდა და მიდგომა მხოლოდ ბოლო პერიოდში შეიცვალა.
თბილისის წყალსადენის ქსელის სიგრძე, დიამეტრით 13 მმ-დან და 1400 მმ-მდე 3000 კმ-ზე მეტია. მაგისტრალური წყალსადენები თუჯის და ფოლადის მილებით არის მოწყობილი, განშტოებები კი უმეტესად ფოლადის მილებით. წყალმომარაგებისთვის ქალაქის სხვადასხვა რაიონში და სხვადასხვა ნიშნულზე, 35 ადგილზე, 86 სამარაგო რეზერვუარია განთავსებული (საერთო მოცულობით 317 000 მ3). მოსახლეობის მთავარი უკმაყოფილების საგანს გეგმური და არაგეგმური გათიშვები წარმოადგენს. მილების დიდი ნაწილი საბჭოთა დროინდელია, ნაწილი უფრო ძველი. კომპანია გათიშვებს მოძველებული ქსელითა და სარეაბილიტაციო სამუშაოების აუცილებლობით ხსნის.
2019 წელი GWP-მ 35 მლნ ლარიანი მოგებით დაასრულა, 2020 წელს კი მოგება 49 მლნ ლარიანი ზარალით შეიცვალა. ზარალი შემოსავლის კლებამ, ფინანსური ხარჯებისა და კურსთა შორის სხვაობის შედეგად მიღებულმა დანაკარგის მოცულობის ზრდამ გამოიწვია.
„ჯორჯიან უოთერ ენდ ფაუერი“ („კომპანია“) 1997 წლის 25 ივნის შპს-დ დარეგისტრირდა. 2008 წელს კომპანიის 100%-იანი წილი შპს „ჯორჯიან გლობალ იუთილითიმ“ შეისყიდა. 2021 წელს მიღებული გადაწყვეტილებით 2022 წელს GWP-ის 80%-იანი წილი ესპანურმა Aqualia-მ $180 მლნ-დ შეიძინა. გარიგებიდან ჯერ ძალიან მცირე დროა გასული და შესაბამისად ბაზარს ცვლილებები არ დასტყობია. სემეკის ცნობით ახალი ინვესტორი არსებული ტარიფებით ოპერირებას 2023 წლის ჩათვლით გააგრძელებს. მაღალი ალბათობით 2024 წლიდან ტარიფი გაიზრდება, თუმცა რამდენით და რა ვალდებულების შესრულების სანაცვლოდ ამის შესახებ ამ ეტაპზე მიახლოებითი ცნობებიც არ ვრცელდება.
წყალმომარაგებასა და საკანალიზაციო ქსელის ოპერირებასთან ერთად GWP ელექტროენერგიის გენერაციასაც ახდენს. 2021 წელს ჟინვალჰესიდან, თეთრხევიჰესიდან და ბოდორნაჰესიდან კომპანიამ 316 მლნ კვტ/სთ ელექტროენერგია აწარმოა, ქვეყნის ჯამური გენერაციის - 2.5%.