სამხრეთ კორეამ ურბანული საჰაერო მობილურობის მანქანების (UAM) მართვის სისტემა წარადგინა, რომელსაც საჰაერო ტაქსის ფუნქცია მიენიჭება და 2025 წელს მგზავრებს სეულის ცენტრიდან მთავარ აეროპორტებამდე მოემსახურება. ეს მგზავრობის დროს ორი მესამედით შეამცირებს.
Reuters-ის ცნობით, გასულ წელს სამხრეთ კორეამ საგზაო რუკა გაასაჯაროვა, რომლის მიხედვითაც, 2025 წელს კომერციული ურბანული საჰაერო მგზავრობები უნდა დაიწყოს. ქვეყნის ტრანსპორტის სამინისტროს შეფასებით, 30-დან 50 კმ-მდე ავტომობილით მგზავრობის ერთსაათიან დროს საჰაერო სერვისი 20 წუთამდე შეამცირებს.
„მოსალოდნელია, რომ UAM ერთ-ერთი ჩვეულებრივი სატრანსპორტო საშუალება გახდეს, რასაც მოქალაქეები ყოველდღიურ ცხოვრებაში იყენებენ, ამიტომ აუცილებელია, UAM-ის სერვისები სხვადასხვა გარემოში შევამოწმოთ და გამოვცადოთ,“ - აცხადებს ტრანსპორტის მინისტრი, ნო ჰიონგ-ოუკი.
პილოტმა სეულის გიმპოს აეროპორტში გერმანული კომპანია Volocopter-ის მიერ დამზადებული ორადგილიანი მოდელი გამოცადა, რათა მისი კონტროლი და კოორდინაცია ეჩვენებინა. ვერტმფრენის მსგავსი ვერტიკალური აფრენა-დაფრენის მოდელის მართვა შესაძლებელია როგორც პილოტით, ისე უპილოტოდ, ავტონომიურად. თუმცა ბორტზე მგზავრების ყოფნის დროს, უსაფრთხოების უზრუნველყოფისთვის UAM აუცილებლად პილოტმა უნდა მართოს.
სამხრეთ კორეელმა კონსტრუქტორებმა საკუთარი საჰაერო უპილოტო მოდელიც წარადგინეს. ტრანსპორტის სამინისტროს ცნობით, სრული ზომის პროტოტიპი, სავარაუდოდ, სატესტო ფრენებს მომავალ წელს დაიწყებს, რისი მიზანიც ხუთადგილიანი ვერსიის შემუშავება იქნება.
ღონისძიებაზე სხვა ტექნოლოგიების დემონსტრირებაც მოხდა, რომელიც თვითმფრინავის აღმოსაჩენ და დაკვირვების მოწყობილობას წარმოადგენდა. ასევე, დრონების დაშვება-აფრენის ადგილებისთვის „ვერტიპორტების დაპატენტებული განათების სისტემა წარადგინეს.
2025 წელს, როცა კომერციული მგზავრობები დაიწყება, ინჩეონის საერთაშორისო აეროპორტიდან სეულამდე მგზავრობა, სავარაუდოდ, 110,000 ვონი (93 დოლარი) ეღირება. ეს პრემიუმ ტაქსით მგზავრობაზე ძვირია, მაგრამ 2035 წლის შემდეგ, როცა ბაზარი მომწიფდება, საჰაერო მგზავრობის ფასი, დაახლოებით, 20,000 ვონამდე (17 დოლარამდე) დაიკლებს.
სატესტო ფრენამ დაადგინა, რომ ქვეყნის საჰაერო მოძრაობის კონტროლის სისტემას, რომელიც აეროპორტებში შიდა და საერთაშორისო ფრენებს მართავს, UAM თვითმფრინავების მონიტორინგიც შეუძლია.
„ეს აჩვენებს იმას, რომ არსებული საჰაერო მიმოსვლის ოპერაციები შესაძლოა, UAM-ის ოპერაციებთან ჰარმონიაში განხორციელდეს,“ - აცხადებს ქვეყნის ტრანსპორტის მინისტრი.
bpn.ge