ევროპაში სატვირთო მანქანებისა და ავტობუსების მძღოლებზე მაღალი დეფიციტია. მიმდინარე წლის იანვრიდან სექტემბრამდე მძღოლებზე მოთხოვნა 44%-ით გაიზარდა. საგზაო ტრანსპორტის საერთაშორისო კავშირის (IRU) ანგარიშის თანახმად, 2026 წლისთვის სატვირთო მანქანის მძღოლის შეუვსებელი პოზიციების რაოდენობა 60%-მდე გაიზრდება, ქალაქისა და საქალაქთაშორისო ავტობუსების მძღოლებზე მოთხოვნა კი შესაძლოა 50%-ით გაიზარდოს.

შედეგად, ევროპას შეიძლება სამ წელიწადში ორ მილიონზე მეტი მძღოლის ნაკლებობა ჰქონდეს, რაც გავლენას მოახდენს ტვირთების ტრაფიკის ნახევარზე და მილიონობით სამგზავრო მოძრაობაზე.

დღეისათვის ახალგაზრდა მძღოლების წილი მცირეა (6% სატვირთო და 5% სამგზავრო მოძრაობაში). სატვირთო მანქანების მძღოლების მხოლოდ მცირე ნაწილი მოდის ქალებზე. მინიმალური საკვალიფიკაციო ასაკი სატვირთო მანქანის მძღოლებისთვის კვლავ 21 წელია, ევროკავშირის ავტობუსის მძღოლების უმეტესობისთვის კი 21-დან 24 წლამდე.

მძღოლების დაქირავებას ლიცენზიებსა და მათ ტრენინგებზე მაღალი ხარჯები აფერხებს. საფრანგეთში სატვირთო მანქანის ლიცენზია 5300 ევრო ღირს, რაც სამჯერ აღემატება საშუალო თვიურ მინიმალურ ხელფასს, გერმანიაში კი ავტობუსის ლიცენზია საშუალოდ 9000 ევრო ღირს, რაც ყოველთვიურ მინიმალურ ხელფასს 4-ჯერ აჭარბებს.

უსაფრთხოება, განსაკუთრებით ქალი მძღოლებისთვის, გადამწყვეტია პროფესიის მიმზიდველობისთვის: სატვირთო მანქანების მძღოლების 95% და სატრანსპორტო კომპანიების 94% ამ საკითხს მთავარ პრიორიტეტად ასახელებენ.

თუმცა, ევროკავშირში არსებული სატვირთო ავტოსადგომების მხოლოდ 3% არის უსაფრთხოებაზე სერტიფიცირებული.

„ევროპაში მძღოლების დეფიციტის კრიზისი სწრაფად მწვავდება და თუ ამ მიმართულებით არაფერი გაკეთდება ეს სერიოზულ საფრთხეს შექმნის.

ევროპაში საქონლის 75%-ი სატვირთო ავტომობილებს გადააქვთ, მათ გადააქვთ ასევე მალფუჭებადი, მაღალი ღირებულების და სამედიცინო საქონელი (მათ შორის ვაქცინები და საკვები) 85%-ი.

ავტობუსებით გადაზიდვა კოლექტიური ტრანსპორტის ყველაზე ხშირად გამოყენებული ფორმაა ევროკავშირში“, - აცხადებს IRU გენერალური მდივანო ჰუმბერტო დე პრეტო.

მისივე თქმით, მძღოლების გარეშე ევროპის ეკონომიკის განვითარება და სოციალური მობილურობა შეფერხდება. IRU-ს ანგარიშში წარმოდგენილია 20 გადაწყვეტილება, რომელსაც ამჟამად საავტომობილო ასოციაციები, კომპანიები და გადამყვანები ახორციელებენ.

„მთავრობებმა უნდა გაატარონ გარკვეული ზომები, რათა თავიდან აიცილონ დეფიციტის ესკალაცია, მათ შორის: ავტომობილის მართვის მინიმალური ასაკის დაწესება 18 წლიდან, სწავლება 17 წლიდან; ახალი მძღოლებისთვის ლიცენზიებისა და სწავლების ხარჯების სუბსიდირება; უფრო უსაფრთხო და უსაფრთხო პარკირების ადგილების შექმნა, - აღნიშნულია IRU-ს ანგარიშში.